Brgy. People’s Council vs pagpurotol kan kahoy

Nagpaluwas man nin pusog na panindugan an Naga City Barangay People’s Council Federation for Community, Inc. na saindang pigcocontra an pagpurotol kan DPWH sa mga kakahoyan sa gilid kan tinampo na sakop kan national road. Si Esmeraldo Luna, retiradong PENDRO Officer kan Department of Environment and Natural Resources (DENR) sa Camarines Sur asin actibong opisyal kan Brgy. People’s Council Federation nagsabi na igwa na sindang pinasar na manifesto nganing ipaabot sa mga maninigong ahencia de gobierno sa tahaw kan dakul nang pinarutol na kahoy sa Magsaysay Avenue asin sa iba pang lugar. Sa saindang manifesto an mga lugar na saindang hinahagad na dapat imantenir asin dai purotolon an gurangan na kakahoyan iyo an nasa Balatas road, Peñafrancia - San Felipe - Panicuason road, Brgy. Mabolo hasta sa Brgy. Del Rosario porsyon kan Maharlika Highway, Magsaysay Avenue asin Panganiban Drive. An DENR igwa nang permiso sa DPWH nganing purotolon an kahoy sa gilid kan tinampo sa saindang ginigibong road widening project. An mga kakahoyan digdi tinanom nin mga estudiantes gikan sa manlaen-laen na universidades asin colegio, opisyales asin empleados kan ciudad, asin iba pang sektores na pigmamando kan gobierno nasyonal asin kan LUNTIAN DAAN Program ni Senador Loren Legarda. Nangangahulogan kaini na an mga kakahoyan iyo an produkto kan manlaen-laen na agencias siring kan nasyonal, lokal na gobierno, organisasyon civico asin residentes para sa pagprotehir kan kapalibotan, sabi pa. Tolong pahina an saindang manifesto alagad kun kaipuhan nang pahiwason an tinampo para sa mototista saindang pigsuhestiyon an mga kahoy dapat ibalyo sa lugar na makakabuelong magdakola asin magtubo huli ta igwang benipisyo ini nganing magkakaigwa kita nin prescong duros. Sa City Hall, sinabi ni Bise Alcalde Nelson Legacion na kun igwang nag-uulang sa pagputol kan mga kakahoyan sa gilid kan tinampo sa ginigibong road widening project kan DPWH alagad igwa man grupo an nagpapabor digdi mala ngani sa pinakahuring survey kan Ateneo de Naga University Social Science Research Center mayoria kan mga taga Naga pabor na purotolon na an ulang na mga kahoy sa tahaw kan saindang ginigibong pagpahiwas kan national road. (DPA)