SA PAGHIRAHAY KAN PHILIPPINE NATIONAL RAILWAYS: Bordado, NPS ‘67, ADN ‘71 mapaapod symposium


Si Congresista Gabriel H. Bordado Jr. kan tercer distrito kan Camarines Sur, Naga Parochial School 1967 asin Ateneo de Naga 1971 Association Inc. mapaapod nin symposium nganing tukaron asin seguradohon sa gobierno nasyonal na kun hihirahayon an relis kan Philippine National Railways dapat iimplementar na an standard gauge o halakbang na relis envez kan presenting sa suanoy na narrow gauge o hayapit na relis. Saindang iinvitaran na mga visita asin mataram sa isyu sa upgrading kan perokarril an manlaen-laen na sektores sa Bikol, Bise Presidente Leni Robredo, Senador JV Ejercito Estrada, Assistant Secretary Cesar Chavez kan Department of Transportation (DOTr), Congresista Cesar Sarmiento kan Catanduanes na iyo an pamayo kan Committee on Transportation sa Camara-Baja, PNR General Manager Jun Magno asin iba pang mga visita na pinapadarahan na nin imbitasyon. An programa gigibohon sa Ateneo de Naga University sa Oktubre 19, 2017. Sinabi ni Bordado katuyohan kan symposium nganing maaraman kan publiko orog na kan mga Bikolano kun ano na talaga an kamugtakan kan PNR na papabulosan nin bilyones pesos na fondo kan gobierno nasyonal. Yaon na sa mandato kan DOTr na iyo an maimplementar mantang an congreso igwa nang hinihimong legislative action para sa funding support sa operasyon asin upgrading kan perokarril. Sa suanoy na an presenting relis kan PNR na duwa na sanang nasyon an naggagamit kaini na iyo an Filipinas asin Africa. Sinabi pa kan congresista saro sa isyu na saindang tutukaron na ciertohon sa gobierno nasyonal na kun papakarhayon an mga linya kan relis kan tren dapat i-upgrade na bako lang hirahayon perang bulan raot na naman. Prueba kaini kan taon 2011 matapos kan rehabilitasyon alagad pakatapos nin siyam na bulan na paggamit kan relis kaini paralisado naman si viaje huli ta liwat naman naraot. Masasayang an bilyones pesos na fondo afuera kan nakasunad na house bill kan congresista kan tercer distrito para sa dugang na funding support sa prosupuestong bilyones pesos na uutangon sa China para sa modernong proyecto sa PNR South Commuter Line na dakulang bagay sa pag-asenso sa economia bako lang sa Ciudad nin Naga envez sa rehiyon Bikol. An plano sa PNR bako lang Bikol-Manila alagad sa enterong nasyon na an viaje haling Norte bako lang Luzon envez Visayas hasta sa Mindanao. Sakuyang sinusuportaran an lakdang na ini ni Presidente Rodrigo Duterte na dapat marealisar na an nationwide railway system huli ta mayo pang nag-asensong nasyon na mayong back-up na toltol na railway system, sabi pa kan congresista kan tercer distrito kan Camarines Sur. Dinagdag pa na nag-uyon na an National Economic Development Authority (NEDA) na standard gauge an gagamiton alagad an problema kun nuarin iimplementar mantang sa parte kan congreso igwa nang ginibo na enot nang pinasar na bill sa congreso na nagtataong awad-awad na funding support kan representante pa kan tercer distrito kan CamSur si Leni Robredo na ngonian bise presidente na kan nasyon. Kun an nasyon nin Japan madonar nin train magagamit digdi sa Filipinas huli ta an gamit duman standard gauge. (DPA)