SA ROAD WIDENING PROJECT SA NAGA: Php 200-M na fondo ibabalik na kan DPWH

IbABAlik na kan opisina central kan Department of Public Works and Highways (DPWH) an docientos milyon pesos (P200-M) na pigtagamang fondo nganing idagos an naulang na implementasyon kan road widening project kan Daang Maharlika Highway asin Melchor T. Villanueva Avenue (dating Liboton St.) asin puponan an patrabajo sa sunod na taon 2018. Si Assistant District Engr. Richard Ragrario kan 2nd Engineering District kan DPWH sa Baras, Canaman, Camarines Sur nagpahayag sa Bicol Mail na sainda nang idadagos an implementasyon kan proyecto na enot nang naulang sa Daang Maharlika Highway matapos dai magtugot an City Hall asin grupo nin mga environmentalist na purotolon an darakulang kakahoyan sa gilid kan tinampo na nag-eedad na nin sobra sa sesenta años. An proyecto kun daing kaulangan dapat na implementar sa panahon kan administrasyon ni Presidente Aquino, hinahagad kan DPWH na magcooperar an publiko mantang an benepisyo para sa gabos. ‘’Mandato samo kan gobierno nasyonal na gabos na national road gibohon nang four lanes, viente metros an lakbang na dapat masunod afuera kan Daang Maharlika na dapat treinta metros an lakbang’’ An Daang Maharlika Highway hali sa Brgy. Mabolo hasta Brgy. Del Rosario asin an M.T. Villanueva Avenue kaipuhan pahiwason an hayapit na tinampo huli ta ini an nasumpay kan national road puon sa Tinambac, Calabanga, Bombon, Magarao, Bagumbayan Norte asin Sur sa Ciudad nin Naga naaging Magsaysay Avenue pasiring sa Daang Maharlika paluwas sa Brgy. Del Rosario asin pasiring sa banwaan kan Pili na iyo an kabisera kan provincia nin Camarines Sur. An lokal na gobierno kan ciudad hinagad sa DPWH na ibalik na an fondo para sa road widening asin aprobado na kan saindang opisina central mantang nagtugot na an City Hall para sa pagputol kan mga ulang na kahoy sa proyecto na aprobado kan DENR, sabi pa ni Engr. Ragrario. Si Ragrario, saro sa mga nagtaram sa dialogue consultation na ginibo kan Lunes, Septiembre 25 na padreno an Naga City People’s Council na kabale sa nagtaram sinda Alcalde John Bongat City Planning Officer Willy Prilles asin Armando Molleda kan DENR na nagpaliwanag kan mga proceso sa pagkua nin permiso sa pagputol nin kahoy. Saiyang pigtawan linaw sa mga nag-aatendir na manlaen-laen na sektores an isyu sa pagputol kan mga kakahoyan sa gilid kan tinampo nganing madagos na an iimplementar na milyones pesos na proyecto sa infrastractura. Sinabi pa na kabale sa katuyohan kaini na mapahiwas an tinampo para sa bulos kan trafico, dapat magsunod sinda sa ASEAN standard sa minimum na four lanes. Nasa 15 por ciento kan mga tinampo sa laog kan Naga mga national road na sakop kan DPWH. Sa M.T. Villanueva Ave. duwang veces nang ibinalik sa central office si fondo alagad idadagos na kan obras publica an road widening project na pigpunan nang paaramon an mga apektadong mga maysadiri kan edificio asin estractura oras na punan an patrabajo. Mas dakul an edificio na hahagopon mantang 52 sanang kakahoyan an mapuputol. Dai man apektado an nagpapadagos na proyecto sa San Felipe road dawa nag-isyu nin temporary environmental protection order an corte huli ta padagos an patrabajo alagad pendiente muna an pagputol kan mga kahoy mientras na pighahalat an pinal na desisyon kan jusgado, sabi pa. Dawa igwang ibang grupo an nagcocontra sa pagpurotol kan mga kakahoyan sa gilid kan tinampo alagad an mga Barangay Council na aagihan kan proyecto an saindang lugar pabor na putolon na an ulang na mga kahoy. Afuera pa kaini, nagsusuporta man digdi an Parish Pastoral Council asin nakakasakop na parokya mala ngani nagpadara pa kan saindang manifesto sa City Hall. (DPA)