SABI KAN BAYAN BIKOL : Robredo pabor kasohan an contratista kan housing project sa biktima ni ‘Yolan


Apektado an calidad sa mga patrabajo sa housing project sa mga biktima ni bagyong Yolanda huli ta nagkaperang veces pina-sub contract kan ganador na contratista an resulta kan proyecto sub standard man. Huli kaini, dapat lang sangatan sinda nin maninigong caso, sabi ni Bise Presidente Leni Robredo. Planong magsangat nin caso an House Committee on Housing and Urban Development sa contratista kan housing project para sa mga naging biktima kan bagyo may apat na taon na an nakakalihis. Sinabi Robredo na durante kan siya pa an pamayo kan Housing and Urban Development Coordinating Council (HUDCC), saiya nang pinagtuyaw an salang pulisiya na pinagsusunod sa pag implementar kan housing project particularmente an sentralisadong pagpalakaw kaini kan National Housing Authority . Huli ta dakula an Housing Project solamente mga contratistang may lisensyang Triple A category an nakaka-contrata. Alagad an mga ini bako man taga Leyte, Samar o sa lugar kan mga biktima kan Yolanda kaya pinapa-sub-contract na sana ini. Nadiskubre pa kan Bise Presidente na may patrabahong apat hasta limang veses nang pinag-pa-subcontract kun kaya apektado na an calidad kan proyecto. Huli ta yaon sa NHA an darakulang proyecto, dai kaya kan nasabing ahencia na maparikas an pagpapatapos kan patrabaho. Dinagdag pa antes siya mag nagdemiter sa HUDCC, pinag suhestiyon niya na an mga local government unit na sana an mag-implementar kan patrabaho sa nasabing mga provincia tubod an bise presidente na mas mapapadali ini huli ta mas aram kan mga nasa LGU an pangangaipo kan saindang mga nasasakupan. An nasabing suhestiyon pinaboran man kan mga gobernador kan magpa-apod siya nin pagtiripon bago niya pinagbayaan an ahencia. (Melvin Machado)