Sala an pigsasabi ni Sr. Supt. Panganiban - Kgd. del Castillo

‘’He is barking at the wrong tree o sala an pigsasabi niya na may ordinansa an lokal na gobierno kan Ciudad nin Naga na pwedeng gibohon one way an bulos kan trafico sa mahiwas na tinampo sa tungod kan Saint Joseph School.’’ Ini an tuyaw ni Consejal Salvador del Castillo contra ki Acting City Director Jonathan Panganiban kan Naga City Police Office sa pinadarang surat kan ACD sa City Hall sa tahaw kan haloy nang pagcuestion kan consejal kun tano ta nagiging one way an trafico sa mahiwas na tinampo sa tungod kan sinambit na escuelahan apesar na mayong ordinansa kaini an ciudad. An pigsasabing niyang one way tinampo sa Saint Joseph School sa atubangan ka-parallel kan relis kan Philippine National Railways, bakong si pasiring sa Bicol Acces, sabi pa kan consejal. Si Del Castillo, haloy nang nag-privilege speech sa sesyon regular kan Sanggunian Panlungsod na saiyang pigcucuestion kun tano ta padagos na ginigibong one way an tinampo sa sinambit na lugar apesar na mahiwas asin mayo man nin maninigong ordinansa na dapat sunodon kan Public Safety Office. Ginastosan kan gobierno an pagpagibo nin mahiwas na tinampo alagad pera sana an nakikinabang orog kun siribot sa oras an vehiculos dai pwedeng gibohon yan huli ta an dapat makinabang iyo an publiko, sabi pa. An pamayo kan NCPO invitado sa sesyon regular kan SP alagad dai nag-atendir nganing simbagon an isyu kun gurano ka-epektivo sa paz y orden an pag-shut down kan signal kan mga companiya nin telepono sa panahon na gayo kan darakulang actividades sa nagtapos na Peñafrancia fiesta. Dai pig-onra kan SP si pinadarang representante kan NCPO sa sesyon kan Martes, Septiembre 26 envez hinurot na dapat si Panganiban iyo an personal na mag-atendir sa sunod na sesyon regular. Dakul an negatibong reaksyon asin reclamo sa sinambit na isyu kaya ngani mawot hagadan nin paliwanag kan SP an pamayo kan NCPO. Afuera pa kaini, sinabi pa ni del Castillo dapat simbagon mismo kan opisyal kan PNP an isyu sa mga pig-iimplementar na ordinansa sa trafico. An Acting City Director enot nang pig-probaran na kuanan nin entrevista kan Bicol Mail nganing hagadan kan saiyang lado sa sinambit na isyu alagad nagsayuma mag-atubang huli ta an dapat ma-interview iyo an opisyal na parataram kan NCPO. (DPA)