NFA nagbabakal mais kan paraoma alagad limitado


An National Food Authority (NFA) sa Camarines Sur preparado nang magbakal kan inaning mais nin mga paraoma sa halangkaw na presyo puon ngonian na Oktubre hasta Diciembre 30, 2017, alagad limitado an saindang fondo. Abot sana sa sesenta mil (60,000) na sakong mais an saindang babakalon huli ta limitado man an fondo kan ahencia na pinadara gikan sa saindang opisina sentral. Ini an mga pahayag ni NFA Assistant Provincial Manager Norra Follosco sa Sangguniang Panlungsod kan Ciudad nin Naga kan siya maging visita nganing hagadan nin paliwanag kun ano an saindang tabang sa apektadong paraoma sa agrangay sa padagos na pagbagsak sa presyo kan mais sa mga pribadong comprador. Pambahog sa hayop an saindang binabakal asin solamente an mga feeds miller iyo an nagbabakal kan saindang stock. Cantidad P12.50 an saindang bakal cada kilo kun icocompara sa mga comprada na nag-aabot sana sa P9.50 na dakulang pagkalugi sa mga paraoma, sabi kan NFA. Si Consejal Julian Lavadia Jr, pamayo kan Committee on Agriculture sa SP kan ciudad iyo an nagtulod na dapat mahagadan ninda nin paliwanag an NFA asin Department of Agriculture kun ano an saindang tabang sa sektor nin paraoma huli ta apektado an saindang hanap buhay sa pagparababa kan presyo kan mais. Sinabi ninda Arlene Almeda kan DA Bikol asin Folloso, saro sa causa kan pagbaba kan presyo huli kan halangkaw na produksyon nin mais sa Camarines Sur asin kulang na an poultry farm matapos magsara perang bulan na an nakakakaagi, na an mayor na dahilan iyo an inaapod na ‘’the law of supply and demand’’. Si Consejal Lavadia, iyo an chairman kan bagong muknaon na Task Force Salbar Paraoma nganing matabangan an apektadong sektor na nagrereclamo huli kan hababang presyo kan sinambit na produkto. An Naga igwa pang 1,320 hektaryang tanuman nin mais na saro sa may halangkaw nin produksyon digdi sa Camarines Sur. Nagtutubod an NFA na malangkaw na an presyo kan mais sa masunod na bulan nin Noviembre mantang bako nang aranihan nin mais. (DPA)