PLANONG PAGSUHAY KAN CALABANGA, CAM. SUR SA TERCER DISTRITO: Sinikwal ni Bordado, Andaya

Nakasunad pa sana sa enot na pagbasa an propuestong resolusyon ni Bise Alcalde Ramonsito Robles sa Sangguniang Bayan kan Calabanga, Camarines Sur na isuhay an saindang banwaan sa tercer distrito asin magdakit sa premir distrito nganing mapagibohan tulay an Balongay road alagad amay sinikwal ninda Congresista Gabriel Bordado Jr. asin Rolando Andaya Jr. Si Bordado, representante kan tercer distrito kan Camarines Sur nagpahayag sa miembros kan media na-insulto siya kan ginibo kan bise alcalde huli ta dai lamang siya pinaisi envez dai niya maaraman kun dai pa nag-text sa cell phone si first district Congressman Andaya na dagos nang nagkaolay sinda sa telepono. ‘Nakaolay ko si Andaya sa telepono asin nagsabi saiya na kan enot hona niya nagsusoba lang si padi (VM Robles), alagad naheling niyang seryoso si panindugan kan bise alcalde.’’ Sinabi pa ni Andaya na dai siya uyon na ibalyo an Calabanga sa premir distrito asin sa redistricting bilang pagrespeto sakuya na kaibanan niya sa congreso, sabi pa. An propuestong tulay posibleng maggastos an gobierno nasyonal sagcod sa labing dos bilyones pesos na dai pang kasigurohan digdi an opisyales lokal kan Calabanga kaya ngani iginilid muna an tinutulod na resolusyon kan bise alcalde. An lakdang kan bise alcalde mayo pang ginigibong consultasyon sa saindang namamanuan. Alagad sinabi pa ni Bordado na kun desidido an bise alcalde nakaandam niyang suportaran an multi-million pesos na proyecto magkakasararo sinda kan mga congresista sa Camarines Sur nganing mailaog sa general appropriation sa national expenditures kan badget nganing marealisar kun igwang rekursos an gobierno nasyonal. Sinabi pa kan congresista na pueding magpagibo nin tulay alagad dai kinakaipuhan an redistricting. Saro sa dahilan kan propuestong resolusyon kan bise alcalde huli ta dai nag-aasenso an saindang banwaan alagad kun marealisar an tulay makakatabang sa economia sa saindang lugar asin pagtaraid na munisipyo. Dai man uyon si Bordado na dai nag-aasenso an saindang banwaan huli ta an Calabanga, saro sa duwa sanang munisipyo asin an Pili digdi sa Camarines Sur na first class municipality. Pigbuyagyag kan congresista na sa mga munisipyo kan tercer distrito an Calabanga na saiyang banwaan halaba an listahan kan mga pig-iimplementar na mga proyecto sa infrastractura sa mga minasunod na barangay, San Isidro, Lapurisima, Quipayo, Sta. Cruz, Fabrica, Belen, Bunot, Sta. Rosa, Bigaa, Sibao, Binaliw, Manguiring, Cabanbanan, Cagsao asin iba pang mga barangay. Afuera pa kaini, igwa pa siyang mga proyecto sa edukasyon, agricultura, livelihood, health na dakul an nadara niyang proyecto digdi kun icocompara sa ibang mga banwaan na sakop kan saiyang distrito, sabi pa. (DPA)