SA PUV MODERNIZATION PROGRAM: Duterte: Manga PUJ dapat mayo na sa 2018


Matapos i-orgulyo kan sektor nin transporte an saindang mahiwas na juelga sa pusog nindang pagcontra sa modernization program sa public utility vehicles (PUVs), alagad patanid an bueltada sa sainda ni Presidente Rodrigo Duterte na dapat magsunod sa reglamento kan gobierno kun dai guguyodon an saindang vehiculo. Puon sa Enero 1, 2018 dapat malinig na an tinampo asin mayo na kan loma nang mga PUJs, sabi pa sa patanid. Taboga an inaabot kan grupo kan Pinagkaisang Samahan ng mga Tsuper at Operator Nationwide (Piston) na iyo an nangenotan sa juelga kan Lunes asin Martes sagcod na inapod sinda ni Duterte na legal branch kan Communist Party of the Philippines asin NPA na kabale sa grupo kan nasa likod sa distabilisasyon. Nagmoda pa an presidente nin ‘’pu… ina’’… na ngingisihan an gobierno kun dai maipasunod an modernization program. Si Presidente Duterte iyo an mayor na bisita sa Federalism Summit and PDP Laban Oath taking sa maabot sa siete mil na opisyales lokal asin barangay na pinangenotan ni Gobernador Migz Villafuerte kan Camarines Sur na ginibo sa Capitol Convention Center sa banwaan nin Pili. Sa mga pahayag kan presidente, sinabi kaini na an ginibong juelga kan sektor nin transporte dai makakapugol sa gobierno sa pag-implementar kan Public Utility Vehicle Modernization Program (PUVVMP), na haloy nang dapat naipasunod kan mga nakaaging administrasyon alagad dai narerealisar huli kan mga protesta na dai pueding mangyari ini sa saiyang administrasyon. Inakusaran pa kaini an Piston, Kilusan Mayo Uno (KMU), asin Karapatan na midmid nang mga legal branch kan CPP/NPA na nakakakomiter na nin rebelyon. Katuyohan kan PUVVMP nganing i-phase out an quince años pataas na apektado digdi an may dos cientos mil na jeepneys sa nasyon, alagad an sektor nin transporte nagpapahayag na malinaw na ‘’anti poor’’ an programang ini kan gobierno nasyonal. Pig-oopresir kan gobierno an electronic jeepney karibayan kan loma nang PUJs alagad an sabi kan Piston dai ninda kaya an presyo orog na si mga ordinaryong operator. Sinabi pa kan presidente na an mga PUJs na ginagamit sa ngonian loma nang marhay na nag-eedad na nin 20 hasta 25 años na grabe na an boga nin maitom na aso asin dakulang epekto sa salud sagcod na mahulog sa cancer. Interes publiko digdi an dapat tawan prioridad orog na sa salud asin kun dilapidated na an sasakyan puedi pang gikanan nin mga aksidente asin tinatawan ko kamo nin sarong bulan, sabi pa. Sa mensaje pa kan presidente hinagad niya sa mga lideres kan Bikolandia na suportaran an saiyang pigtutulod na federalismo na dapat ribayan na an presenting presidential form of government na panahon pa kan España asin kita nalang digdi sa Filipinas an igwa kaini mientras na sa pagtaraid tang nasyones kan ASIA yaon na sa federalismo. (DPA)