VM Robles napasala sa pagmata - LRay

Posibleng napasala sa pagmata si Bise Alcalde Ramonsito Robles kan Calabanga, Camarines Sur kan biglang itulod an sarong resolusyon sa Sangguniang Bayan na dapat magsuway na sinda sa tercer distrito kan Camarines Sur envez magbalyo sa premir distrito ni Congresista Rolando Andaya Jr. sa dahilan nganing mag-asenso an saindang banwaan. ‘’Relax lang Vice Mayor Robles’’ Ini an mga pahayag sa press conference ni Congresista LRay Villafuerte kan segundo distrito kan Camarines Sur bilang reaksyon sa kahurotan kan bise alcalde na dapat magbalyo na sinda sa premir distrito nganing matulayan an Balongay road pasiring sa Cabusao, Camarines Sur. Sinabi kan congresista na bakong madali an pagpaconstruhir nin tulay na gagastosan nin bilyones pesos mantang kaipuhan digdi an feasibility study na kabale sa mga rekisitos kan National Economic Development Authority (NEDA). Dai man kaipuhan an ‘’redistricting’’ sa sarong magtaid na munisipyo kun papagibohan nin dakulang tulay asin magastos nin dakulang cantidad an gobierno, sabi pa. Alagad amay pa posibleng magaba an plano ni Robles huli kan kakulangan nin suporta kan saiyang pagiriba asin kan Calabangueño. Afuera pa kaini pueding ma-duplicate an proyecto sa ipapagibong tulay ni LRay na masumpay kan Brgy. Concepcion, Libmanan asin Canaman, Camarines Sur na pigtatapos na an feasibility study na haros cierto na an bilyones pesos na proyecto. Mapagibo nin tulay digdi alagad mayo sa plano kan congresista kan segundo distrito kan CSur na an Canaman na sakop kan tercer distrito dapat magbalyo sa saiyang sakop na segundo distrito. Kun marealisar an proyecto mapapalipot an oras nin viaje asin puede nang mag-agi digdi an mga vehiculos haling Calabanga, Magarao, Bombon, Tinambac asin iba pang mga banwaan na mapasiring sa Manila. An dapat gibohon hagadon ki Congresista Andaya asin Congresista Bordado kan tercer distrito na magtarabangan nganing mapundohan an pagpaconstruhir nin tulay na dai man kaipuhan an redistricting ngani sanang marealisar an proyecto. (DPA)