2 munisipyo sa CSur mayo pang fire truck

Duwa na sana sa treinta y cinco banwaan asin duwang ciudades sa Camarines Sur an mayo pang sadiring fire truck huli sa kawaran nin donasyon nin lote sa Bureau of Fire Protection (BFP) asin an ika-duwa igwa nang lote asin edificio alagad mayo pang narerecibing fire truck. Si Chief Inspector Jose Callos Jr., dating OIC Provincial Fire Marshal kan BFP sa Camarines Sur asin iyo na an nagtutukaw na Fire Marshal kan Naga City Fire Station nagpahayag na an munisipyo na sagcod sa ngonian mayo pang sadiring fire truck iyo an Canaman asin Garchitorena. An pinakahuring nagkaigwa asin nakarecibing fire truck gikan sa BFP central office iyo an Lagonoy kan nakaagi sanang Abril 2017. Saro sa rekisitos nganing matawan nin fire truck dapat igwang donasyon na lote na dapat espuerso na kan lokal na gobierno nganing bugtakan nin permanenteng fire station. Dawa mayong fire truck an munisipyo kan Canaman asin Garchitorena, igwa man nagtutukaw na Fire Prevention Officers (FPO) na an saindang trabajo iyo an advocacia sa mga residentes kan sakop nindang banwaan na maglikay sa kasulo. Dinaog pa sinda kan Gainza asin Bombon, na parejong pinakasadit na banwaan sa Camarines Sur alagad haloy nang igwang sadiring fire truck gikan sa BFP. An saindang destinong FPOs nagcoordinar na sa sinambit na mga LGU na pwedeng makabale sa listahan an sarong munisipyo na matatawan nin fire truck alagad kaipuhan igwa seguradong lote na papatindogan nin fire station na dapat idonar kan sarong LGU. Piglinaw man ni Callos kun mayo pang fire truck an duwang munisipyo an fire responder kaini kun may magbungkaras na kasulo iyo an Fire Station harani sa saindang banwaan o ciudad. An opisina kan FPO sa sarong munisipyo igwang cell phone asin telepono asin radyo na iyo an gagamiton sa pag-apod sa fire responder encaso igwang emergencia na kaipuhan an fire truck hale sa pagtaraid na banwaan asin Fire Station na iyo an saindang responder. An obligasyon kan FPO sa saindang area of responsibility (AOR) iyo an magcampaña sa fire prevention, mag-inspeksyon kan mga establisimiento de negosyo na seguradohon na nagsusunod sa fire code, asin mag-implementar kan fire collection fees pig-iisyu sa mga aplikante sa fire clearance. Si Callos, nag-asumir sa pwesto kan Agosto 22, 2017 saiyang pigribayan si dating Fire Marshal Supt. Albert de Baguio na iyo na ngonian an Assistant Regional Director kan BFP Bikol asin presenting temporaryong nagtutukaw bilang CamSur Provincial Fire Marshal. An BFP Naga, igwang walong fire truck, sarong ambulancia, 55 personajes kabale na an fire marshal asin sarong sub station sa Barangay Tabuco na igwang sadiring fire truck na parating andam na magresponde sa ibang munisipyo na kaipuhan an saindang tabang. (DPA)