SP mapasar nin resolusyon sa isyu sa pag-utang sa China

Itutulod kan sarong miembro sa Sanggunian Panlungsod kan Ciudad nin Naga na magpasar sinda nin resolusyon nganing hagadon sa gobierno nasyonal na kun malaog sa Overseas Direct Assistance (ODA) dapat maghanap nin ibang nasyon na nag-oopresir nin mas hababang ipapatong na interes na paborable sa gobierno. Si Consejal Mila Raquid-Arroyo, pamayo kan Committee on Public Utility sa SP nagsabi sa exclusibong entrevista kan Bicol Mail na sa masunod na sesyon regular saiyang papadrenohan an resolusyon nganing hagadon sa Department of Transportation (DOTr) na dapat dai maging sarado an gobierno sa saro sanang nasyon na mag-utang nin bilyones pesos para sa modernisasyon kan Philippine National Railway (PNR) envez maghanap na dai dejado an Filipinas. Sa ginibong forum on PNR modernization sa Avenue Plaza Hotel sa Ciudad nin Naga kan Viernes, Oktubre 20 an DOTr sa paagi ni Usec Cesar Chavez nagpahayag na an gobierno kan Filipinas mautang nin P151 bilyon sa China para sa reconstruction kan Bicol Express. Sa uutangon kan gobierno mapatong nin dos por cientong interes an China cada taon mientras sa nasyon kan Japan nag-oopresir sana nin 0.5 interes, sa Korea zero interest. Dapat maghanap an DOTr nin ibang nasyon na dai malulugi an gobierno, sabi pa ni Arroyo. Saiyang piglinaw na dai sinda contra sa pag-utang nin fondo alagad hanapan nin solusyon na dai mababangkaruti an nasyon sa bilyones pesos na interes. Si Consejal Julian Lavadia Jr. nagpahayag man na saiyang susuportaran an papadrenohan na resolusyon ni Arroyo nganing ipadara sa DOTr asin sa congreso nganing iconsiderar an saindang kahagadan paborable sa gobierno Filipinas. Sa cuentada kan consejal kun sa dos por cientong interes sa uutangon na P151-B magbabayad an Filipinas nin P3-B na interes cada taon alagad kun sa laog nin sampolong taon aabot nin P30.02-B dai pa kabali digdi si prinsipal na inutang na cantidad na garo man sana ginigisa kita sa sadiring mantika, kun aboton pa nin vienteng taon magpapara dakula an obligasyon kan Filipinas. Nagsoba na sana an consejal na tibaad kun dai kita makabayag kan dakulang pagkaka-utang posibleng iribay kan gobierno an Spratly Island. Si Lavadia, sa saiyang privileged speech sa sesyon regular kan SP kan nakaaging Agosto 8, 2017 nagsabi na dapat idetalye ni DOTr Secretary Arthur Tugade an gigibohon na implementasyon sa modernong proyecto sa perrokaril. Paborable sa mga Bikolano kun magkaigwa nang viaje kan Bikol Express alagad dapat adalan na marhay na dai malulugi an satong gobierno asin dai kita mabangkaruti sa pagkaka utang, sabi pa ni Lavadia. An gobierno mautang nin P500 bilyon para sa railways system puon Luzon, Visayas asin Mindanao na saro sa mayor na proyecto sa transportasyon ni Presidente Duterte (DPA)