MNWD mapalugi sa water lorry boat

Matapos perang taon nagpataw-pataw sa Bicol river an water lorry and rescue boat na ginastosan nin sobra sa P8 milyon kan Metropolitan Naga Water District (MNWD) magiging operational na ini matapos basbasan na kan Oktubre 30 hapon alagad inako kan manijamiento na dai sinda naglalaoman nin ganansa envez pagkalugi bilang saindang responsibilidad sosyal sa consumedores na kaipuhan an malinig na tubig inumon. Enot na pigbuyagyag kan Bicol Mail sa isyu kaini kan Hunyo 8, 2017 na sayang an ginastosan na milyones pesos na proyecto kan MNWD huli ta pataw-pataw sana sa salog apesar na dapat natapos an proyecto kan huring cuarto kan 2015. Sa exclusibong entrevista kan Bicol Mail sa duwang opisyales kan MNWD na sinda Board Chairman Jorge Palma asin Division Manager Engr. Virgilio Luansing saindang sinabi na huli kan saindang responsibilidad sosyal kaipuhan magdalagan an water lorry boat nin aga asin hapon an viaje nganing masuplayan nin tubig an maabot sa 833 na household namay total na 4,060 persona sa mga residentes na nag-eestar sa gilid kan salog sa Camaligan, Gainza, Canaman, Magarao asin puede pang magluwas sa iba pang mga banwaan sa Camarines Sur. An preskong tubig kukuanon sa pumping station sa pamitisan kan Mt. Isarog. An MNWD, sarong Government and Owned Control Corporation (GOCC) na saindang tinatawan nin atensyon iyo an pagtaong serbisyo sa publiko alagad segundaryo sana an ganansya mientras na magkakaigwa nin higot na pag-monitor an manijamiento sa premirong lorry boat kan water district digdi sa Bikol, sabi pa ni Palma. Sa cuentada ni Engr. Luansing aabuton sana nin P111,000 an saindang venta bulan-bulan alagad sa operating expenses maabot sa P115,000 o lugi nin P4 mil cada bulan kabali na si pang sueldo sa empleados na dapat lisensiyado kan Philippine Coast Guard. Igwa sanang duwang tangke na may laog nin sampolong cubico nin tubig na ipapabakal an tubig nin P6 hasta P8 cada container. Sinabi pa kan division manager na kan Mayo 8, 2015 na-award an proyecto sa sarong contractor na taga Ciudad nin Cavite asin an notice to proceed kan Hunyo 26, 2015 na dapat matapos an proyecto sa laog nin 180 diyas. Inabot nin 419 aldaw an pagkaabala asin kompletong natapos kan Marso 16, 2017 o nagkaigwang abala nin sarong taon asin duwang bulan. An proyecto kan water lorry and rescue boat naaprobaran sa junta directiva kan MNWD kan panahon ni Board Chairman Fortunato Mendoza sa katuyohan na madara sa mga residentes sa gilid kan salog an saindang serbisyo sa tubig inumon. Piglinaw ni Chairman Palma na kun dai tolos naging operational an lorry boat bakong kasalan kan manijamiento alagad an contractor na kinastigo nindang multang dos milyon pesos (P2-M) Piglansar an water lorry, rescue boat alas 3:00 nin hapon sa Barangay Sto Domingo, Camaligan, Camarines Sur na pinangenotan ninda Board Chairman Palma, Acting GM Virginia Nero, Division Manager Virgilio Launsing, mga miembros kan junta na presente an ibang opisyales lokal gikan sa mga banwaan na sakop kan serbisyo kan MNWD.