Pamayo kan MSEAC pigsusurog kan NEA

‘’Ok lang kun may resolucion alagad an National Electrification Administration (NEA) nagsabi na mayo sindang guideline na dapat automatico declaradong naghelig na sa puesto an miembro kan MSEAC na nagcandidatong director asin nadaog sa district election.’’ Sa entrevista kan Bicol Mail, ini an reaksyon ni Irsam ‘Sam’ Flores, Federation President kan MSEAC kan Camarines Sur II Electric Cooperative (Casureco II) sa padagos na pagpugol kaini sa puesto na dapat magsunod sa resolucion kan junta directiva numerado 2017-169 na ‘’deem resigned’’ sa pagplantiar pa sana nin certifico de candidatura bilang candidatong director kan Naga North district sa ginibong eleksyon kan Agosto 27, 2017. Dinaog siya sa district election ni Director Angelino Cornelio Jr. na iyo an nagcuecuestion kan saiyang presencia sa cooperativa na pigbabasehan kaini an saindang board resolution 2017-169. An miembros kan MSEAC napipili kan saindang pigrerepresentar na sektor sa paagi nin nominasyon asin an junta directiva iyo an napirma kan saindang nombramiento. Si Flores, nagrerepresentar kan sektor civico asin bakong elihidong opisyal lokal o maging sa barangay. Igwang NEA guidelines na si mga incumbent director na napili sa paagi kan district election kun macandidato sa eleksyon lokal considerado naghelig sa puesto sa pagplantiar pa sana nin COC sa Comelec, sabi pa. Sinabi pa maging si NEA Project Supervisor Nelson Lalas nagsabi na an MSEAC member dai kabali sa NEA guidelines na ‘’deem resigned’’ kun nagcandidatong director asin nadaog sa eleksyon. An pamayo kan MSEAC nakaatendir pa sa board meeting kan premirong semana kan Oktubre 2017 na nagsumiter kan MSEAC budget asin padagos pa siyang pigmimidmid kan NEA. Huli kaini, nagtutubod si Flores na mayong epekto an pigsasabing board resolution kan Casureco II. (DPA)