SA CASURECO II: Resolucion kan junta dai na-iimplementar

An arin man na miembro kan Multi-Sectoral Electrification Advisory Council (MSEAC) kan Camarines Sur II Electric Cooperative (Casureco II), automatico nang declarado na nagdemiter na sa puesto oras na magplantiar kan saindang certifico de candidatura bilang candidatong director alagad dai man na-iimplementar kan junta directiva. Alagad apesar kan aprobadong Board Resolution No. 2017-169 kan Casureco II dai man ini na-iimplementar. ‘’automatico na declaradong mayo na sa puesto an arin man na miembro kan MSEAC oras na magsangat pa sana kan saiyang certifico de candidatura bilang candidatong director’’, sabi sa tuyaw ni Director Angelino Cornelio Jr. kan Naga North District. An resolucion na-aprobaran kan Agosto 24, 2017 na pirmado ni Board President John Paul Santa Ana kan districto nin Calabanga. Sinabi ni Cornelio saiyang pigcuecuestion an padagos na pagtenir sa puesto ni MSEAC Federation President Irsam ‘’Sam’’ Flores nagcandidatong director sa Naga North District sa ginibong district election kan Agosto 27, 2017 asin dinaog niya sa pirilian alagad yaon pa sa MSEAC kan Casureco II. Saiya pang pigbuyagyag sa ginibong nindang board meeting kan enot na semana kan Oktubre 2017 pigreconecer pa kan saindang pamayo kan junta si Flores na nagpresentar pa kan P700 mil na MSEAC budget na ibinasura man sana kan junta asin kan committee on finance. Dinagdag pa ni Cornelio an isyung ini nakatalaan niyang darahon sa NEA Administrator nganing malinawan asin sunodon kan habong maghaling pamayo kan MSEAC. (DPA)