Contratista babawian licensiya kan DPWH

Canaman, Camarines Sur – An 2nd Engineering District kan Department of Public Works and Highways (DPWH) nagpatanid na sa NFH Construction and Supply na kun padagos na papabayaan na dai hirahayon an permi nalang nalalabot na San Jose Bridge sa Pili, Camarines Sur ibabali sinda sa pweding i-blacklist na contratista sa ahencia. Si Assistant District Engineer Richard Ragrario nagpahayag na sinuratan na ni District Engr. Rebecca Roces an contratista nganing balikan an saiyang pigtrabajon tulay na naglalabot naman an tahaw na porsyon kaini na padagos natutuyawan kan lokal na gobierno kan Pili. Alagad an contratista envez na dapat taposon an paghirahay pakatapos kan Peñafrancia fiesta naghagad nin extension na tawan pa sinda nin panahon nganing punan an paghirahay. An mga ingeniero kan Bridge Inspectorate hali sa saindang oficina central naheling na an kamugtakan kan tulay na dapat pakarhayon huli ta igwa pang obligasyon an constratista sa amay na pagkaraot kan proyecto na dai pa ngani na sarong taon. Pigsugo na kan DPWH an NFH Construction na magcoordinar sa LGU Pili nganing mag-informar kan gigibohon na pagpakarhay kan tulay asin oras kan patrabajo na makakaulang sa bulos trafico. Pinaabot na kan LGU sa DPWH Secretary Mark Villar an depektosong patrabajo kan tulay kan huring semana kan Hunyo 2017. An San Jose Bridge ginastosan nin P85-milyon na enot nang nagbutwa an labot kan Mayo 2017 na delicado sa mga motorista asin pasajeros na nag-aagi sa tulay. Ano man na gastos sa rehibilitasyon kan San Jose Bridge sisimbagon pa kan contratista, sabi pa kan DPWH. (DPA)