PDEA CAMARINES SUR: Nakakasiod dorogista na mayong nagagadan

Dakula na an acomplisimiento kan Philippine Drug Enforcement Agency (PDEA) sa Camarines Sur matapos ibuelta sa ahencia ni Presidente Rodrigo Duterte an guerra contra droga na mayong nagbulos nin dugo sa suspechado maging sa lado kan awtoridad. Maabot na sa quince mga persona an nagkasiriod na kadakli sa sainda dakulang supplier nin droga na igwa nang total na P15 milyon sa street value sa saindang nakonfiscar na 2.3 kilos na shabu sa limang operasyon puon kan Oktubre 24 hasta Noviembre 10, 2017. An Camarines Sur iyo an may halangkaw na acomplisimiento sa droga digdi Bikol asin an satong rehiyon iyo man an nangengenotan sa iba pang mga rehiyon sa nasyon. Prioridad ninda an ‘’big time pusher’’ na sa laog sana nin 18 diyas abot na quince mga suspechado an saindang nagkadarakop asin milyones pesos na an naconfiscar na cantidad nin droga. Si Agent Vidal Bacolod, jefe kan PDEA Camarines Sur nagsabi na mayong isyu sa extra judicial killings sa ginibo nindang mga anti-drug operations na mayong nagbulos nin dugo huli ta dai naglaban an saindang mga nagkakadarakop asin saindang estricto pig-iimplementar an rules of engagement mientras an andam nindang i-depensa an sadiri ano man mangyari. An limang magkasurohay na mga operasyon laban sa droga ginibo sa Bula, Baao, Canaman, an pinakahuri iyo an buy-bust operations sa apat na mga suspechado sa laog kan taxi kan nakaaging Noviembre 4 sa Almeda Highway, Ciudad nin Naga na nakonfiscar an cantidad P6 milyon na shabu. Sa apat na nagkadarakop nakonfiscar sa babaeng para bitbit droga na si Olivia Encinas, 60 años kan Ciudad nin San Pedro, Laguna iyo an apat na dakulang plastic sachet na maylaog nin shabu na nagcacantidad nin P6-Milyon. Naging epektibo an saindang operasyon sa Ciudad nin Naga asin pagkakaarestar ki Encinas na pigkanta na an saindang supplier nin droga na binabagsak sa Bikol na nagresulta sa saro naman na anti-drug operation sa Kawit, Cavite na nadakop an duwang Nigerians an sarong kilo shabu sa ginibong buy-bust operation sa paagi kan undercover agent. An duwang Nigerians pigbisto kan PDEA na sinda Desmond Chima Ozoma, 35 asin Solomon Lewi Anochiva, 34. An pinagsarong fuersa kan PDEA CamSur asin PDEA Regional Office IV-iyo an nagconducir kan operasyon mga alas 12:15 aga kan Noviembre 8, 2017 o apat na aldaw matapos kan saindang pagkakadakop sa grupo ni Encinas sa Naga. (dpa)