Referendum sa Casureco II isasabay na sa AGMA

Isasabay na sa agenda sa ika-31 Annual General Membership Assembly (AGMA) kan Camarines Sur II Electric Cooperative (Casureco II) an referendum nganing papilion an miembros-consumedores kun mawot nang magbagong estado an cooperativa hali sa presenting superbisyon kan National Electrification Administration pasiring sa pagparehistro sa Cooperative Development Authority (CDA) asin sa Security and Exchange Commission (SEC). An AGMA na magiging bisita si NEA Administrator Edgar Masongong pigtalaan sa Diciembre 9, 2017 sa Capitol Convention Center sa Cadlan, Pili, Camarines Sur na mapuon alas 11:00 nin aga hasta alas 5:00 nin hapon. Si Naga North Director Angelino Cornelio Jr. nagsabi an gigibohon na referendum pigmamando na sa gabos na cooperativa nin electricidad base sa Seksyon 12 (na nag-eenmienda kan Seksyon 32 kan P.D. 269) kan Acta Republica No. 10531. Sa pigtalaan na referendum papapilion an miembros-consumedores kun mawot pang ipadagos an presenting pagpadalagan kan cooperativa na nasa lindong kan superbisyon kan NEA, sa stock/profit oriented cooperative sa irarum kan CDA o sa stock corporation sa irarum kan SEC. Susog sa implementing rules and regulations (IRR) kan sinambit na ley, pinalawig kan NEA hasta sa Enero 15, 2018 na dapat nakaconducir na kan referendum an gabos na cooperativa nin electricidad nganing andaman an pagbagong estado nin cooperativa kun isinikwal na kan miembros-consumedores an presenting sistema kan manijamiento. An manijamiento kan Casureco II padagos an saindang ginigibong pagdistrubuer nin mga papeles sa rinibong consumedores na nakasurat an mga bentaje asin disventaje kun mababago an presenting estado kan cooperativa. Narisa sa saindang pigdidistrubuer na polyetos na pigpapaliwanag na mas paborable an presenting manijamiento kan cooperativa na nasa superbisyon kan NEA. Sinabi pa ni Director Cornelio pabor sinda na nasa lindong kan NEA an superbisyon mantang sa presenting cooperativa sinda sarong non-profit alagad kun papaboran an pagparehistro sa CDA o sa SEC magiging profit oriented na an Casureco II. An mga banwaan na sakop kan serbisyo kan Casureco II iyo an Pili, Milaor, Minalabac, Camaligan, Canaman, Magarao, Calabanga, Tinambac-Siruma asin Ciudad nin Naga na compuesto na nin maabot sa 100 mil na miembros-consumedores. (dpa)