Waste to energy facility marerealisar sa masunod na duwang taon


An lokal na gobierno kan Ciudad nin Naga decidido na madagos an waste-to-energy facility na piglalaoman pweding marealisar sa masunod na duwang taon. ‘’Maocupar sana nin sarong hektarya lote compara sa sanitary landfill (SNL) na kaipuhan an 4.5 hektarya asin makakaproducir pa nin enerhiya,’’sabi ni Bise Alcalde Nelson Legacion, pamayo kan Sanggunian Panlungsod kan ciudad. An mga opisyal asin ingeniero kan Aquilini Mactan Renewable Energy (AMBRE) Inc. sa pamamayo ni Jesus Jayme Jr. nagkumpirmar na maatubang sa opisyales lokal kan City Hall nganing idetalye asin ipresentar an operasyon kan saindang renewable energy project na igwa nang facilidad sa Ciudad nin Lapu-Lapu. An mga miembros kan Sanggunian Panlungsod sa pamamayo ni Legacion nabisita na an operasyon kan waste-to-energy facility sa Ciudad nin Lapu Lapu asin ni Bise Presidente Leni Robredo. An planta kan AMBRE sa sinambit na ciudad naka-ocupar sana nin sarong hektarya lote. An propriedad kan City Hall sa Brgy. San Isidro nag-aabot sa diez hektarya na dakulang bagay na makakatipid sa espaso nin lote an ciudad, sabi pa kan bise alcalde. Nagkapera nang companya nag-oopresir kan renewable energy project sa City Hall alagad mayong ikatukdo kan saindang aktual na operasyon nganing mapatubod mientras na tada nang raya an ciudad sa C.G. Global Corporation. Sa ngonian an SNL project kan ciudad pighahalat nalang an pag-isyu nin Environment Clearance Certificate (ECC) kan Department of Environment and Natural Resources (DENR) Bikol nganing iimplementar na an proyecto na gagastosan nin P268 milyon. (DPA)