20K dugang na votantes sa CSur

Pili, Camarines Sur – Sagcod na sana sa Noviembre 30, 2017 an ultimo dia sa pinalawig na rehistrasyon nin mga votantes mantang piglalaoman kan Commission on Election an dugang na viente (20) mil na votantes para sa maabot na Barangay asin Sangguniang Kabataan elections sa Mayo 14, 2018. An Comelec liwat nagpadagos kan extended registration puon kan Noviembre 6 hasta 30 asin bukas an mga opisina kan commission cada munisipyo kaayon an aldaw nin Sabado asin holiday ngani sanang tawan nin awad-awad na panahon an mapalista alagad dai na kabali an aldaw nin Domingo. Si Alex Marpuri, parataram kan Comelec Camarines Sur nagsabi na si enot na duwang semanang pagpalista kulang an nagpipila asin piglalaoman na maruso an tawo sa mga huring aldaw kan Noviembre. Kan huring rehistrasyon kan Abril 2017 igwa nang 1,060,000 na rehistradong votantes, kun magsagad sa viente mil an bagong nagpalista magkakaigwa nang total na 1,080,000 an rehistradong votantes sa Camarines Sur, sabi pa kan Comelec. Kabali sa dapat magpalista para sa SK si nag-eedad nan in 15 hasta 17 años antes kan eleksyon sa Mayo 14, 2018 na kaipuhan magdara kan saindang birth certificate asin school ID. Para sa mga regular na votantes dapat nag-eedad nin 18 años antes kan eleksyon sa Mayo 14, 2018 asin dapat magdara nin ano man na validong ID mientras na dai na aakoon an cedula asin barangay certificate, sabi pa ni Marpuri. (dpa)