Infirmary Hospital uusaron extension clinic kan MHO

Calabanga, Camarines Sur – Posibleng maging operational na sa 2018 an Infirmary Hospital sa Sitio Labog kan Barangay Paolbo sa banwaan na ini alagad mahingowa muna an Technical Working Group (TWG) na magbukas na an hospital sa Diciembre 2017 bilang extension clinic kan Municipal Health Office mientras na nasa proceso na sa Department of Health (DOH) an pagkua nin license to operate (LTO). An TWG na pinamamayohan ni Bise Presidente Leni Robredo kaibanan sa grupo sinda Diputado Gabriel H. Bordado Jr. kan tercer distrito kan Camarines Sur, Gobernador Migz Villafuerte, LGU Calabanga asin DOH Bikol nagkaigwa nin miting sa laog kan edificio kan hospital sa Brgy. Paolbo, kan nakaaging Noviembre 17 asin nagkasurondo na gibohon muna bilang extension clinic kan MHO. Kun dai pa nagbilog kan TWG si Robredo asin nagpaapod nin miting dai ma-aaraman an kakulangan kan Infirmary Hospital na rekisitos kan DOH Bikol. An representante kan DOH nagsabi na kaipuhan pa an P22 milyon para sa dagdag na mga facilidades nganing maging full operational an hospital afuera kan nagkaperang mga rekisitos antes sinda mag-isyu nin LTO. An sinambit na cantidad magtatabang sinda VP Robredo asin Diputado Bordado na maghanap nin fondo para marealisar an hospital. An DOH iyo an masuplay nin mga laboratoryo asin iba pang facilidades na mayor na kaipuhan kan sarong hospital mantang nagcierto an ahencia na matao sindang dagdag na fondo na cantidad P5.9 milyon. Si Gobernador Villafuerte nagsabi na preparado na an saindang P12 milyon na prosupuesto para sa personajes kan hospital cada taon, afuera pa kaini an Capitolyo iyo pa an magastos para sa pagpa- tiles kan salog na aaboton sa P1.5 milyon. Walong nurses asin apat na mga doctor an kinakaipuhan. Si Alcalde Ed Severo nagsabi man na magiging contribusyon kan LGU Calabanga iyo an pagpatakod nin linya kan tubig gikan sa Calabanga Water District. Sa miting kan TWG, presente si City Health Officer Dr. Vito Borja na nagpaliwanag kun panong nagpuon sa premiro an City Hospital sa Ciudad nin Naga nganing matawan ideya an LGU Calabanga sa pagpadalagan kan sarong Infirmary Hospital. An pagpaconstruhir kan edificio kan hospital narealisar kan makahagad nin fondo sa DOH kan congresswoman pa kan tercer distrito kan Camarines Sur si VP Robredo kaya ngani nagbilog siya kan TWG para maparikas na maging operational alagad mapuon muna bilang sarong clinic kun maabala pa an pag-isyu nin LTO kan DOH. An lugar kan hospital tuyong pigdara sa harayong barangay nganing madaling maabot kan mga pasyente gikan sa may distancia residentes kan barangay na dai na kaipuhan magpasiring sa Ciudad nin Naga. (DPA)