Mawawalat na evacuees maparehistro sa Comelec

Tanganing maseguro na makakaparticipar sa pirilian lokal sa Mayo 2019 an mawawalat na setenta (70) por ciento kan mga evacuees sa Ciudad nin Naga na haling Ciudad nin Marawi maparehistro nalang sa Commission on Election digdi. Sa listahan kan City Welfare and Development Office (CWDO) kan City Hall igwang kagabsan na 176 na mga evacuees asin an cincuenta y dos (52) sa sainda o trienta por ciento iyo an decidido na makapuli sa Marawi puon sa Enero hasta Febrero 2018, sabi ni Mike Mustapha, pamayo kan Maranao Guild for Solidary Inc., grupo nin mga Muslim na nag-eerok na sa Naga. An 124 o setenta por ciento an dai na interesado na magpuli sa pinaghalian na lugar sa Marawi envez magtenir na sa Naga asin digdi na maghanap buhay asin magparehistro sa Comelec nganing ciertong makaparticipar sa pirilian lokal sa Mayo 2019. Sinabi ni Mustapha na pigmamawot na kan evacuees na digdi na maghanap buhay huli ta maogmang lugar, matuninong asin mayong problema sa paz y orden. Sinda pinautang kan City Hall nin cantidad P5 mil sa paagi nin opisina kan PESO Office asin ginagamit nindang capital sa sadit na negosyo sa pagtienda sa night market cada aldaw nin Viernes asin Domingo. An inutang igwang kondisyon sa City Hall na babayaran nin utay-utay na dapat mabayadan an obligasyon antes magpuli sa Marawi. Sa osipon kan lider kan Muslim, sinabi kaini na dakulang bagay an suporta sa sainda kan City Hall huli kan mga ayuda sa saindang familia kun icocompara sa ibang mga evacuees na nagdayo sa Albay asin Camarines Norte na dai pig-asikaso kan LGUs. Napag-araman pa ni Mustapha na si ibang mga evacuees nakalaog na sa trabajo sa call center asin an iba nag-eescuela sa sarong colegio sa ciudad. (dpa)