NEA nakakaabala sa relokasyon kan mga poste nin electricidad

Naghahalat na sana kan pag-aprobar kan National Electrification Administration (NEA), an 2nd Engineering District kan Department of Public Works and Highways (DPWH) sa Baras, Canaman, Camarines Sur sa ‘’costing’’ sa parsiyal palang na pigsumiter kan Oktubre 16 kan Camarines Sur II Electric Cooperative (Casureco II) sa mga lugar na pig-iimplementar na road widening project sa Ciudad nin Naga asin pagtaraid na banwaan, nganing maponan na an relokasyon kan mga poste nin electricidad. Ini an paliwanag ni Engr. Richard Emmanuel Ragragio, Assistant District Engineer kan 2nd Engineering District kan DPWH sa tahaw kan tuyaw kan publiko sa abalang relokasyon kan mga poste kan Casureco II mientras nagpapadagos an mga road widening project kan ahencia sa mga national road sa tercer distrito kan CamSur asin iba pang distrito asin afuera pa kaini, igwa nang tapos alagad yaon pa an mga estractura sa tinampo na yaon sa laog kan highway na delicado sa mga aksidente sa trafico. Si Project Supervisor/Acting General Manager Nelson Lalas kan Casureco II nagsumiter na kan saindang costing sa NEA na nagcacantidang nin P16.8 milyon para sa mga electrical post sa mga national road sa Ciudad nin Naga asin pagtaraig na banwaan na apektado kan pig-iimplementar na road widening project. Sinabi pa kan DPWH na kun sa laog nin sarong taon dai matapos an pag-inbentaryo asin pagbalyo kan mga poste sa tamang lugar dai na sinda mabayad envez an cooperativa na nin electricidad an igwang obligasyon kan gastos, ini base sa Joint Circular kan Department of Energy asin DPWH na nag-epekto kan Hulyo 20, 2017. Nagtutubod si Ragragio na kun na-aabala an papales sa NEA huli kan tambak na mga costing na pigsumiter kan mga cooperativa nin electricidad mantang an kaparejong isyu bako lang digdi sa Bikol envez sa enterong rehiyon kan Filipinas. An NEA susog sa kasundoan kan DOE asin DPWH, an Casureco II asin NEA iyo an ma-‘’costing’’ o mapresyo kan ibabalyong mga poste, alagad si presyo nindang ibabase nalang sa unit price na pinapasunod sa sainda kan NEA. Alagad si pigbiklad na presyo dadarahon kan cooperativa sa NEA para sa saindang review and approval, pag-aprobado na kan NEA ibabalik samo para madara sa opisina central kan DPWH nganing tagamahan nin fondo, sabi pa ni Ragragio. (DPA)