Road widening project kan DPWH, pinapapundo

Huli kan delicado sa mga aksidente sa motorista, si Congresista Gabriel H. Bordado Jr. kan tercer distrito kan Camarines Sur hinuhurot na sa 2nd Engineering District kan Department of Public Works and Highways (DPWH) sa Baras, Canaman, Camarines Sur na ponduhon na muna an patrabajo sa mga road widening project sagcod na dai pa na-iimplementar kan Casureco II an pagrelocar kan mga electric post hali sa right of way kan national road. Si Bordado, nagsurat ki District Engr. Rebecca Roces na dapat igilid na muna kan ahencia an implementasyon kan proyecto sagcod na dai pa nareresolberan an pagpahali kan mga estractura sa tinampo huli ta pwedeng maging causa nin aksidente sa trafico asin doble trabajo. Sinabi man ni Assistant District Engr. Richard Ragragio, sagcod kasuodma dai pa ninda narerecibe an surat kan congresista kan tercer distrito. Kan nakaaging Hunyo 30, 2017 an congresista enot nang nareparo sa DPWH sa padagos na pig-iimplementar na proyecto sa pagpahiwas kan mga national road alagad yaon pa an mga estractura mantang mayo man ginigibong lakdang an cooperativa nin electricidad. Kasunod kan tuyaw kan congresista sa DPWH, kan Hulyo 10, 2017 an Department of Energy asin DPWH nagkasundo sa sarong Joint Memorandum Circular na resolberan an sinambit na isyu na kun haen an cooperativa nin electricidad dapat magsumiter kan saindang program of work asin cuentada sa relokasyon kan mga poste. Isusumiter sa NEA an cuentada asin an ahenciang ini iyo an ma-aprobar kan costing sa mga poste na ibabalyo sa tamang lugar hali sa right of way kan national road. Sagcod sa ngonian langkag na an DPWH sa NEA nganing magpaluwas na nin fondo an opisina central kan obras publika. An 17th Congress nagtagama na nin fondo para relokasyon kan gabos na mga poste sa enterong nasyon na apektado kan proyecto, sabi pa ni Bordado. An isyu sa poste kan mga cooperativa nin electricidad bako lang sa Camarines Sur asin Bikol envez sa enterong nasyon. An congresista igwa nang mga ginigibong coordinasyon sa saiyang pag-iriba sa Camara-Baja na sinda Congresista Celso Lobregat pamayo kan House Committee on Infrastructure asin Congresista Cesar Sarmiento, pamayo kan Transportation Committee nganing maparikas an aksyon kan DOE asin DPWH. (DPA)