P1.14-B budget aaprobaran na sa sesyon kan SP sa Dec. 15

Dai maimponer dugang na buwis

Matalaan nin amay na sesyon regular an Sangguniang Panlungsod kan Ciudad nin Naga envez na dapat gibohon pa sa Deciembre 19, aldaw nin Martes sa maabot nang Viernes, Deciembre 15 nganing maaprobaran na an propuestong 2018 P1.14 bilyon na budget. Si Consejal Cecilia ‘’Nene’’ De Asis pamayo kan Committee on Appropriation kan SP nagpahayag sa Bicol Mail na katuyohan nin pag-abante kan sesyon mientras na pataposon na an pagserne sa executive budget na enot nang pigsumiter ni Alcalde John Bongat sa sanggunian kan enot na semana kan Noviembre 2017. Mas halangkaw nin P28 milyon an propuestong annual budget kun icocompara sa 2017 annual budget na nag-abot sana sa P1,111,041,440.00 alagad sa 2018 nagcacantidad na nin P1,138,780,544.31. Piglinaw ni De Asis na mayong iimponer na dugang na buwis nurong taon kun naglangkaw an 2018 annual budget asin ini mangyayari huli sa paglaog nin dugang na mga investor sa ciudad. Nagkapera nang mga darakulang mall asin sanga kan mga commercial bank asin iba pang establisimiento an padagos na naglalaog sa ciudad asin ini tanda na nag-aasenso an negocio digdi. Igwa nang Central Business District l asin II alagad sa masunod na mga taon marerealisar na an CBD III sa Barangay Triangulo pasiring sa Almeda Highway sa Concepcion Grande, sabi ni Alcalde John Bongat. Sinabi pa ni Alcalde Bongat kun maaprobaran an executive budget iyo na ini an pinakadakulang prosupuesto kun icocompara sa iba pang ciudades kan Kabikolan. An Naga, kabali na sa mga bilyonaryong ciudades sa Filipinas puon ngonian na 2017. Si Bise Alcalde Nelson Legacion, pamayo kan Sanggunian Panlungsod nagsabi na kun daing kaulangan asin mayo nang dapat sernihon pakahali sa committee level puede nang makalusot sa en banc session. Sa propuestong budget ini pigbaranga-banga sa mga minasunod; Personal Services – P432,334,109.17, Maintenance and other Operating Expenses – P406,731,814.52, Capital Outlay – P122,050,000.00, LDRRMF – P56.94M, Aid to Barangays – P8.65M, Other SPAs – 91.08M, Bicol Central Station – P20.34M, MEPO – P42.92M, Naga City Abattoir - P15.71M, Naga City Hospital – P55.59M, Urban Settlements Fund – P30M, Naga River Rehab and Development – P11.39M, Urban Infrastractures –P30M asin Naga City Hospital – P40.7M.