Bongalonta igwa naman nakaabang na suspension

Pili, Camarines Sur – Dai pa ngani natatapos an tolong bulan na suspension kan Ombudsman ki Alcalde Tomas Bongalonta sa banwaan na ini, igwa naman nakaabang anom na bulan na suspension na pinaluwas kan Sanggunian Panlalawigan huli sa inaatubang na caso administrativo. An suspension order kan SP pirmado ni Gobernador Migz Villafuerte asin pigparecibe na ki Bongalonta sa saiyang residencia kan Deciembre 19. An desisyon kan SP CamSur bilang penalidad sa caso administrativo na sinangat ni Punong Brgy. Yolanda Berina kan Barangay San Roque, matapos kan enot na duwang bulan na preventive suspension. An suspendidong jefe ejecutivo pigreclamo kan PB huli kan pagnombra ki Brgy. Kgd. David Olaguer kan Brgy. San Roque bilang driver/bodyguard na naprobaran apesar naka-time in bilang empleado kan LGU Pili alagad nag-aatendir sesyon sa barangay council. Sa en banc decision kan SP CamSur sinabi na an caso kan suspendidong alcalde sarong pagbalga sa konstitusyon na an sarong elective position dai puede nombrahan sa ano man na posisyon sa gobierno. Huli kaini, pigdeclara kan SP na nagkasala si Bongalonta na kinakastigo nin anom na bulan na suspension. Onseng bulan an total na suspension sa alcalde sa tolong taon na termino kaini bilang elihidong pamayo kan Kabesira kan provincia. Siya dai kaalyado sa partido political kan gobernador. Si Vokal Badong Simando, pamayo kan komite sa mga caso administrativo nagsabi na an suspension sa alcalde magiging efectivo sa Enero 3, 2018 matapos kan tolong bulan na suspension na pig-isyu kan Ombudsman.