Liwat na orolay sa modernisasyon kan PNR, pinapaboran kan DOTr

Pinapaboran kan Department of Transportation (DOTr) an resolucion kan Sanggunian Panlungsod kan Ciudad nin Naga na liwat magtalaan nin konsultasyon nganing dangugon an gabos na stakeholders sa Bikol sa isyu kan iimplementar na reconstruction kan Philippine National Railways Bicol Express alagad uutangon an bilyones pesos na fondo sa China na mapatong nin halangkaw na interest rate per annum. Si Bise Presidente Leni Robredo nagkumfirmar kaini sa miembros kan media sa Ciudad nin Naga kaibanan si Congresista Gabby Bordado kan tercer distrito kan Camarines Sur na enot nang nagpadreno sa ginibong Forum on PNR Modernization na pig-iniciar kan congresista katuwang an grupo kan Naga Parochial School Batch ’67 asin Ateneo de Naga 1971 Association Inc. Alagad dai pa nagtaong petsa an DOTr kun nuarin sinda matalaan kan konsultasyon mientras na nagpaluwas nang aviso an agencia sa mga LGUs asin apektadong squatters sa gilid kan relis kan perrokaril na dapat punan na an proceso sa pagrelocar asin pagpahali sa sainda. Sinabi ni Bordado na nagkaigwa nin marhay na resulta an pigpadrenohan ninda Forum kan Oktubre 20, na nagluwas si mga disventaje kun ipapadagos kan gobierno an proyecto sa paagi kan Overseas Direct Assistant (ODA) sa China na nagpapatong nin 2 por cientong interest rate per annum kun icocompara sa Japan na .5 por ciento sana. An SP asin iba pang sektores sa Bikol hinahagad sa gobierno nasyonal na dapat orolayan giraray na kun ma-implementar kan reconstruction sa PNR dapat bakong disventaje sa gobierno kan Filipinas. Si Consejal Julian Lavadia Jr., pamayo kan Trade and Investment Committee sa SP nagpahayag na kun malaog an DOTr sa Overseas Direct Assistance (ODA) tano ta dai maglaog sa hababang interest rate kan Japan na .5 por ciento sana per annum alagad pinaboran lugod kan administrasyon an mas halangkaw na interest rate sa China napa-utang nin P175 bilyon na mapatong nin dos por ciento per annum Sa ginibong Forum on PNR Modernization sa Avenue Hotel kan Oktubre 20, si Bise Presidente Robrero nagpatanid na posibleng malukmok an nasyon sa uutangon na P175 bilyon na fondo para sa Bicol Express na uutangon sa China na igwang dos por cientong interest rate per annum sa laog nin viente años. Dapat maghanap nin ibang alternatibo sa paagi kan Private Public Partnership (PPP) nganing dai malugi an gobierno. Kan Febrero 2015, naaprobaran sa National Economic Development Authority (NEDA) P171 bilyon para sa PNR sa paagi kan PPP na kun haen igwa nang tolong mga interesado na masubasta. Alagad an subasta pinapundo matapos napag-araman na bakong standard gauge an gagamiton sa railways. Pigribayan si desinyo para sa international gauge kan relis na iyo an nakaabala sa subasta kan proyecto alagad an P171B na fondo pigseguro na para sa PNR, sabi pa kan bise presidente. Afuera pa kaini, an dating DOTC matapos aprobaran kan NEDA, an groundbreaking pigtalaan dapat ngonian na Deciembre 2017 na kaipuhan matapos an proyecto sa 2022, base sa pigtalaan na panahon. Pigbuyagyag pa ni Robredo na an pagpadagos kan orihinal na plano sa modernisasyon kan perrokaril sa paagi kan PPP naulang huli kan nakaaging eleksyon kan 2016. Alagad sa bagong administrasyon sa ngonian, an mawot na ipasunod na policia kan gobierno iyo ODA asin iginilid na si PPP. (DPA)