Naga Airport, luway luway nang ginagadan

Pasiring na sa pagparalisar kan transportasyon sa eroplano kun idadagos kan duwang compania an saindang plano na puon sa Enero 18, 2018 envez kan saindang regular na viaje hali sa Naga Airpport pasiring sa Manila matugpa na sa Clark Airport, Pampanga na kinakaipuhan pang mag-viaje an pasajeros nin duwang oras nganing makaabot sa Manila. Si Consejal Julian Lavadia Jr. pamayo kan Committee on Trade and Investment sa Sanggunian Panlungsod kan Ciudad nin Naga nagpahayag kaini kan makuanan nin entrevista kan Bicol Mail matapos kan saiyang privilege speech sa sesyon regular kan Martes, Deciembre 19 na saiyang sinabi na sarong man made calamity an bagay na ini asin kun dagos nang iimplementar sa masunod na taon 2018. Saiyang pigtawan punto na kun duwang oras an viaje kan pasajeros kun malunad sa vehiculo haling Clark Aiport sa Pampanga nganing makaabot sa Manila, madidisganar na an pasajeros sa Ciudad nin Naga asin Camarines Sur maging turista na magviaje sa paagi kan Naga Airport envez an saindang gigibohon malunad nalang sa eroplano sa Legazpi Airport, Ciudad nin Legaspi na matugpa sa Manila. Luway-luway na mawawaraan nin pasajeros an Cebu Pacific asin PAL na iyo na ini an causa nganing magpundo na kan saindang viaje sa Naga Airport mantang mayo nang magbabakal nin ticket para sa saindang viaje pasiring sa Clark Airport, sabi ni Lavadia. Paborable sa viaje kan eroplano sa Ciudad nin Legaspi alagad luway-luway man na ginagadan an Naga Airport sa Pili, Camarines Sur. Saro pa sa naheheling na angulo kun dagos nang mawawara an viaje sa Naga Airport posibleng preparasyon kan Department of Transportation (DOTr) na tawan nin prioridad an propuestong San Jose Airport sa San Jose, Camarines Sur na sakop kan congressional district ni Diputado Arnulfo Fuentebella, sabi pa. Nakasumpay an isyung ini sa Naga Airport na dai palang nahahaloy pigkumfirmar ni Bise Presidente Leni Robredo na nawara na si fondo para sa 2017 asin 2018 nganing gamiton sa re-orientation project kan aeropuerto na padagos niyang hinahagadan nin paliwanag si DOTr Secretary Arturo Tugade envez pigtawan lugod nin prioridad na matagamahan nin prosupuesto iyo an San Jose Airport. Maging an ibang negociantes sa Ciudad nin Naga nagtutubod na posibleng iyo na ini an mangyayaring problema sa viaje sa aire kun iimplementar na an planong ini sa 2018. Sa sesyon regular kan Sanggunian Panlungsod pinangenotan ni Lavadia an pagpasar nin resolucion na suratan kan SP Secretary an Civil Aviation Authority of the Philippines (CAAP) nganing kumfirmaron kun igwa nang orden na i-divert an viaje envez na Naga Aiport-Manila alagad sa Clark Airport na. Afuera pa kaini, nakatalaan padarahan nin komunikasyon an PAL asin Cebu Pacific nganing hapoton kun igwa nang orden na i-divert an saindang viaje asin kun masunod sinda sa orden. Si Congresista Gabriel H. Bordado Jr. kan tercer distrito kan Camarines Sur nangapodan sa manlaen-laen na sektores sa Ciudad nin Naga asin Camarines Sur na magkasararo na magpasar nin resolucion nganing contrahon an planong ini na i-divert an viaje kan eroplano envez na dapat magtugpa sa Manila ibabalyo na sa Clark Airport. Kun mangyari ini dakulang desventaje sa lado nin economia maging sa programa sa turismo na saro sa mayor na programa kan gobierno provincial kan CamSur. Si Gobernador Migz Villafuerte nagpahayag na saindang pigcocontra an lakdang na ini huli ta desventaje sa mga pasajeros sa provincia asin nakatalaan magpasar nin resolucion an Sanggunian Panlalawigan nganing ipadara an saindang opisyal na panindugan. Dai palang nahahaloy an Metro Naga Chamber of Commerce and Industry asin Camarines Sur Chamber of Commerce and Industry nagpasar nin resolucion na hinuhurot sa DOTr na dapat iimplementar na an na-aabalang re-orientation project kan runway sa Naga Airport. (DPA)