SA CAMARINES SUR: 2 alcalde hinali kan Ombudsman, duwa sinuspende kan Capitolyo

Sunod-sunod na an mga kinakastigo kan Ombudsman asin Capitolyo Provincial kan Camarines Sur contra sa nagkaperang jefe ejecutivo lokal kan provincia huli kan mga inaatubang na caso asin an pinakahuring sinipa sa puesto iyo si dating Alcalde asin ngonian Bise Alcalde Gemino Imperial kan LGU Pamplona. Ika-duwa na siyang opisyal sa CamSur na hinali sa puesto kan Ombudsman, enot si Alcalde Melquiades Gaite kan LGU Baao na nagsangat pa nin MR alagad ibinasura man sana kan jusgado. An alcalde sinampaling nin casong grave misconduct and prejudicial to the best interest of the service. Sa pinaluwas na desisyon ni Ombudsman Conchita Carpio-Morales petsado Noviembre 23, 2017 si Imperial hinahali na sa puesto bilang bise alcalde asin naprobaran sa casong grave misconduct and prejudicial to the best interest of the service na sinangat kan nagtutukaw na Alcalde Ace Cruz asin dating Alcalde Rene Francisco kan Septiembre 2016. Naging magabat pa an desisyon huli kan perpetual disqualification na magpugol nin ano man na posisyon sa gobierno. An respondiente, pigreclamo ni Cruz asin Francisco huli ta pinaarkilahan si backhoe kan LGU sa cantidad sanang P500 an aldia apesar na dapat P1,200 an aldia. Desventaje sa lokal na gobierno an hababang presyo na pinaarkila sa sarong construction firm na sadiri kan pigngaranan na Rodolfo Cua. Cantidad sanang P40 mil an naglaog sa caja kan munisipyo envez na dapat P766 mil sa 80 aldaw na paggamit kan heavy equipment. Alcalde pa kaidto si Imperial kan ipaarkila an saindang heavy equipment. Sa lado kan respondiente, sinabi kaini na dai pa tapos an laban legal asin nagsangat na siyang motion for reconsideration huli ta dai natumbok kan saiyang abogado si simbag sa Ombudsman. Saiyang piglinaw na igwang ordinansa an LGU na kapitalista puedeng tawan nin discuento an naglalaog na sa saindang banwaan asin ini saindang ginibo sa contruction firm asin nagtutubod siya na mayong kasalan sa sinambit na caso. Igwa na siyang copya kan desisyon kan Ombudsman na narecibe kan Deciembre 12, 2017 asin hinahalat nalang niya an DILG na iyo an ma-implementar kaini. An numero unong consejal sa resulta kan eleksyon kan Mayo 2016 na si Consejal Boy Franco iyo an matukaw na bise alcalde kun maimplementar na kan DILG an desisyon kan corte. Sa Capitolyo Provincial, an pinakahuring sinampaling nin 60 diyas na preventive suspension kan Deciembre 11 ni Gobernador Migz Villafuerte iyo si Alcalde Bernardo Brioso kan Libmanan, Camarines Sur niribayan ni Bise Alcalde Romel Bulaong bilang Acting Mayor. Grave misconduct and prejudicial to the best interest of the service an saiyang inaatubang na caso na sinangat kan mga miembros kan Sangguniang Bayan huli sa pagtugot na tawan nin permiso an operasyon kan tolong bulangan sa saindang banwaan. Kabali pa sa kinastigo nin 60 diyas na preventive suspension huli sa caso administrativo iyo si Alcalde Tomas Bongalonta kan Pili, Camarines Sur alagad matapos kan duwang bulan na suspension dai nahaloy nagpaluwas man nin tolong na bulan na suspension an Ombudsman matapos maprobaran na nagkasala sa ilegal na pagtanggal sa Municipal Accountant na si Irene Ceron.