Mga motorista sa Bikol nabagat kan nagrasay na daga sa Andaya Highway

Del Gallego, Camarines Sur – Mag-ibong na tinampo kan Brgy. Comadaycaday kan Andaya Highway sa banwaan na ini natahoban nin nagrasay na daga hali sa itaas na lugar kan brgy. huli kan padagos na pagbulos nin uran na apektado an maabot sa trienta hasta cuarenta metros kan highway na naging causa na-stranded an halabang vehiculos palaog asin paluwas sa Camarines Sur. Sa osip ni Frank Verceluz kan Kabalikat Civicom, kan banwaan nin Del Gallego mga alas 4:00 nin aga kasuodmang Miercules nagpupuon nang maghuros an daga sagcod na enterong natahoban an mag-ibong na tinampo mga alas 6:00 nin aga na naging dahilan na mayo nang nakakalusot na buses asin pribadong vehiculos haling Manila asin paluwas sa Bikol. Si Alcalde Lydia Abariento, pamayo kan MDRRMO tolos man pinaluwas an saindang sarong backhoe asin nakaabot man an heavy equipment kan DPWH na nagtarabangan sa clearing operation. Nabukasan sa trafico an highway mga alas 8:15 nin aga alagad liwat naman naghuhuros an daga na iyo si nakaabala sa dalagan kan vehiculos. Sa paagi kan Kabalikat Civicom, Region V Del Gallego Chapter asin Municipal Police Station digdi iyo nagtarabang sa pagmantenir kan trafico para sa re-routing sa paagi kan alternatibong ruta sa Santa Elena, Camarines Norte asin maagi sa Sipocot, Camarines Sur. An problema sa trafico tolos man pinaabot sa regional governor kan Kabalikat Civicom Bikol sa paagi ni Medic Salvino nganing patanidan an publiko. (dpa)