Kasulo sa Naga tinuyo?

Dakulang kalayo an nagsabat sa premirong aldaw kan taon 2018 sa Ciudad nin Naga kan masulo an siyam na kaharongan sa Zona 5, Barangay Igualdad alagad pigdududahan na tuyong sinulo kan sarong nagpasaway na nakainom nin arak na suspechado. Si Fire Marshal Chief Inspector Jose Callos kan Bureau of Fire Protection sa Ciudad nin Naga nagpahayag na pasado alas 2:00 nin maagahon, Enero 1, 2018 nagpuon an pag-arab-adab kan kalayo sa residencia kan familia Bautista asin marikas na naglaila sa iba pang kaharongan na kadakli gibo sa light materials alagad mayo man nalugadan sa insidente mientras nagpapadagos pa an saindang investigasyon sa causa kan kalayo asin sa sahot na tuyong sinulo. Mga ala 2:21 nin maagahon may nag-apod sa saindang Fire Station na may nangyayaring kasulo na tolos man sinda nakaresponde mantang nag-ayuda man an mga Fire Station kan Pili, Milaor, Ching Po Tong Fire Brigade asin iba pang fire brigade sa ciudad. Nakontrol an kalayo alas 3:37 nin aga, sabi ni Callos. An suspechado na pigngaranan na si Felino Bautista, 26 años, soltero, nagdulag sa tahaw kan padagos na paglaila kan kalayo sa mga kaharongan na nagpuon an kasulo sa saindang harong na mayong suplay nin corriente envez naggagamit sana sinda nin candila. An suspechado nagsuko sa Municipal Police Station kan Tinambac, Camarines Sur na kinua siya sa sinambit na Police Station ni PO2 Joven Lopez, investigador sa sinambit na caso. Si Bautista, iyo an pigsasahotan kan mga pagtaraid na residencia na iyo an responsable sa pagsulo kan saindang harong. Sinabi pa na an suspechado enot nang nagparapasaway mientras na burat-burat asin kalaban an saiyang kaibanan sa familia sagcod na nagkurahaw na susuloon niya an saindang harong. Dai nahaloy nagkakalayo na an residencia kan familia Bautista, sabi pa kan nagkaperang testigos. Sa inisyal na investigasyon kan NCPO an suspechado nagpapahimotik sa sahot kan saindang pagtaraid na residencia na siya an kaggibo matapos magkurahaw ini na susuloon niya an saindang harong. Saiya pang pig-osipon na mayo sindang suplay nin corriente na naggagamit sana nin candila na pinatindog sa lamesang flywood. Dai pa napuon an kalayo naghali siya sa saindang harong nganing magbakal nin inumon na arak alagad pagbalik kaini nagkakaraba nin kalayo an saindang residencia asin nagtutubod siya na natumba si candila sa lamesa na iyo an ginikanan nin kasulo. Napiritan siyang magdulag huli ta siya an pig-aacusaran kan mga nakadamay sa kasulo, sabi pa. Binutasan na siya kan NCPO mientras na mayo pang nagsasangat nin casong arson. Si Alcalde John Bongat tolos man nakadalagan sa lugar kan kasulo asin nagtaong ayuda sa mga apektadong familia. (DPA)