Naga-Clark trip pabor sa turista sa Bikol- ACTO

Piglalaoman na malangkaw an numero nin mga turista sa Ciudad nin Naga haling Calabarzon asin Central Luzon ngonian na 2018 kun an ruta kan Philippine Airlines (PAL) hali sa dati kaining flights na Manila-Naga envez Clark Airport-Naga Airport. Kun an ibang sektor nagpapahayag na apektado an regular na pasajeros kan PAL na mapasiring sa Manila huli ta ma-viaje pa nin duwang oras haling Clark Airport, Pampanga alagad positibo an naheheling kan Arts, Culture, and Tourism Office (ACTO) na pinamamayohan ni Alec Francis Santos kan City Hall sa Ciudad nin Naga an desisyon kan PAL na i-divert an saindang ruta na masikad sa Enero 16, 2018. Sa ginibong pag-aadal kan ACTO an saindang target domestic market sa Calabarzon na igwang 1,400,00 o 23 por ciento asin Central Luzon na igwang 770,000 o 13 por ciento, an mga lugar na ini harani sa Clark Airport asin pacil na sa mga turista digdi na magpasiring sa Bikol na pig-oopresir an Ciudad nin Naga bilang gate way. An ACTO nagsurat na sa manijamiento kan PAL na i-promote sa Calabarzon asin Central Luzon an turismo digdi mientras na an Cebu Pacific nilalaoman na madugang kan saindang flights. Mahiwas man kuta an Metro Manila na igwang 3,900,00 o 64 por ciento alagad bibihira man sa sainda an magtuyo digdi sa Naga o sa Bikol, sabi pa ni Santos. Saiya pang sinabi na base sa datus sa mga hotel rooms sa mga ciudades kan Kabikolan, an Naga igwang dakul na numero nin mga cuarto na nag-aabot na sa 2,611, nagsunod an Ciudad nin Legaspi igwang 1,934 mga cuarto, sa Ciudad nin Masbate igwang 589 mga cuarto, Ciuad nin Sorsogon igwang 506 na mga cuarto asin Ciudad nin Iriga – 125. Kabali sa pig-oopresir na lugar na pueding dayuhon nin mga turista iyo an Caramoan digdi sa Camarines Sur, Calaguas sa Camarines Norte, beaches asin mga natularesa na pighahanap kan mga dayuhan digdi sa Ciuad nin Naga. An PAL nagpaluwas na nin anuncio sa publiko na sainda nang iimplementar an bagong ruta kan viaje sa eroplano envez kan Naga-Manila ibabalyo na sa Naga-Clark trip. (DPA)