Karetela gigibohon pang turista

Limitado na an mga nagkakayod na karetela sa Ciudad nin Naga alagad mawot buhayon kan Arts, Culture and Tourism Office (ACTO), bako lang sa hanap buhay kan mga kotsero envez dakulang bagay na makakatabang ini sa programa sa turismo kan City Hall. Sa Alec Francis A. Santos, pamayo kan ACTO na visita sa ginibong meet the press program kan City Events Protocol and Public Information Office (CEPPIO), sinabi kaini na nagkaolay na sinda ni Alcalde John Bongat nganing tabangan an mga nagkakayod nin karetela na madagdagan an saindang hanap buhay asin makakatabang pa sinda sa programa sa turismo. An meet the press sa City Hall, an program host digdi si Allen Reondaga, pamayo kan CEPPIO asin sa participasyon nin miembros kan media. Dakul nang turista an naghahanap nin karetela nganing iyo an gamiton sa saindang paglibot-libot sa ciudad orog na kun banggui na mayo nang problema sa bulos nin trafico. Papagayunon na maging unipormada an karetela para mas maging disente sa publiko alagad an gastos papasanon kan ACTO. Pina-drug test na kan ciudad an mga ataman na kabayo na negatibo sa ano man na kahelingan, sabi pa ni Santos. Kan mayo pang problema sa trafico sa Ciudad nin Naga an karetela saro sa ginagamit na transportasyon kan mga pasajeros na may mga rutang Brgy Dayangdang-Centro asin Abella-Sabang Centro na barato pa an flete. Sa ngonian bilang na sana sa muro an mga nagkakayod sa Barangay Abella na mawot pakusogon kan City Hall an sadit na hanap buhay na ini alagad kun marealisar tutugotan sana sinda mag-viaje kun banggui. Igwa nang nag-eedad na viente años na kabayo na pinapadangat kan mga kagsadiri alagad sinda makakatabang sa turismo. (DPA)