Nagsulo sa 9 na harong kinasohan na nin arson

Isinangat na kan Bureau of Fire Protection (BFP) kan Ciudad nin Naga an casong arson sa fiscalia contra sa suspechado na nagsulo sa saindang harong asin naglaila sa walo pang pagtaraid na residencia sa sona cinco, Barangay Igualdad na nangyari duwang oras matapos maglaog an bagong taon 2018. An suspechado nginaranan ni Fire Marshal Chief Inspector Jose Callos na si Felino Bautista, 26 años taga cinco kan Brgy. Igualdad, isinangat an caso kasuodmang Miercules, Enero 10, 2018 sa fiscalia kan Ciudad nin Naga matapos itukdo siya kan limang mga testigos kabali si Barangay Kagawad Dennis Alamer. Sa investigasyon ni FO2 Domingo Salceda, Arson Division kan Naga City Fire Station nagluluwas na tinuyo an nangyari kasulo mala ngani nakatipon sinda nin prueba laban sa suspechado afuera kan mga testigos nakakua sinda nin lighter, candila asin iba pang mga evidencia sa lugar kan piggikanan nin kasulo. ‘’Circumstantial’’ an saindang evidencia alagad dawa mayong direktang evidencia o testigos na nakaheling sa suspechado na iyo an nagsusulo kan residencia sa familia Bautista na-establiser na an casong arson, sabi pa An mga testigos nagsabi na an suspechado nag-iriwal asin an saiyang ina na si Arlene mga ala diez nin banggui, Deciembre 31, 2017 asin nadangog na nagpapatanid na susulon niya an saindang residencia. Mga alas 12:30 nin aga, Enero 1 nagbakal pa nin arak asin nagpasa pa pa nin bote sa tinampo. Kinakarkulo kan BFP na abot sa P3 milyon an daños sa kasulo alagad dai kabali an residencia ni Arlene Bautista na dai nagsumiter kan saindang affidavit of loss. Sa entrevista ki Brgy. Kagawad Alamer, sinabi kaini na midmid na pasaway sa saindang barangay an suspechado. Dawa na ngani nagpapahimotik si Bautista na enot nang nagsuko sa Tinambac Municipal Police Station, Tinambac, Camarines Sur matapos kan nangyaring kasulo na nagpuon mga alas 2:00 nin maagahon, Enero 1, 2018 asin bigla siyang nawara mientras nag-aarab-adab an kalayo sa saindang residencia asin mga pagtaraid, nakatipon sindang nin mga evidencia asin igwang testigos an BFP kaya ngani idinagos an pagsangat nin casong arson, sabi ni Callos. Si Bautista, isinuko kan saiyang amaon sa Tinambac Municipal Police Station alagad mga alas 4:00 na nin hapon kinua siya ni PO2 Joven Lopez kan Police Station 1 kan Naga City Police Police nganing investigaran. Kan yaon na sa Police Station 1 kan Naga City Police Office (NCPO) an suspechado sa ginibong entrevista ni Lopez nagpapahimotik ini na saiyang tinuyong suloon an saindang harong alagad inako na nag-iwal sinda asin kan saiyang ina. Pig-osipon kan suspechado na mayong suplay nin corriente an saindang harong na naggagamit sana sinda nin candila na pigtutubodan niya natumba asin iyo an pigdadahilan na pigpunan nin kalayo. Dai na-inquest an caso sa corte huli ta mayong formal na nagsangat nin reclamo contra sa suspechado, sabi pa ni PO2 Joven. (dpa)