CAUSA KAN HALANGKAW NA TUBIG BAHA: NIA irrigation canal dapat nang pakarhayon - City Hall

An Sanggunian Panlungsod kan Ciudad nin Naga nanindugan na dapat mag-aksyon na an National Irrigation Administration (NIA) nganing pakarhayon asin ipatama an pakalangkaw kan saindang irrigation control structure asin pakarhayon an dai na nagfufuncionar kan saro sa duwang steel gates na saro sa naging causa sa pagkalubog sa tubig sa mga subdibisyon sa Brgy. San Felipe asin Calauag, gabos na harong sa Villa Karangahan asin CLUPA apektdo. Si Consejal Vidal P. Castillo pamayo kan Committee on Infrastructure sa SP, pinangenotan an pagpasar nin resolucion na hinahagad sa bagong Regional Director kan NIA Bikol na si Engr. Ramon Bugacia na maninigo na an rehabilitasyon kan irrigation canal sa Brgy. Baras, Canaman, Camarines Sur na konektado sa waterway kan Brgy. Calauag kan Ciudad nin Naga. Antes pigtulod ni Castillo an resolucion, nagkaigwa muna siya nin privilege speech sa sesyon regular kan Sanggunian Panlungsod kan Martes, Enero 16 na tinawan niya nin punto an nangyaring paglangkaw kan tubig baha kan Viernes, Enero 12 sa mga subdibisyon sa sinambit na duwang barangay na saro sa causa iyo an halangkaw na irrigation control structure na kun haen an flood gates naka-instelar asin an hayapit na agihan kan tubig sa sinambit na estractura. Afuera pa kaini, an dai pagfuncionar kan saro sa duwang steel gates sa irrigation control na dapat nang pakarhayon kan NIA nganing malikayan na an hararum na tubig baha sa mga subdibisyon kan duwang magkataid na barangay. An halangkaw na irrigation control structure iyo si nakabagat kan paluwas na tubig asin ini dapat ibaba nganing marikas an dalagan kan tubig asin maibitaran an mga paglubog sa tubig, sabi pa. Sinabi pa sa privilege speech kan consejal kan nakaaging Enero 8, 2018 antes kan nangyaring daing pundong uran kan Jueves asin Viernes, si City Engr. Leon ‘Chito’ Palmiano nagsurat na sa regional director kan NIA manunugod sa irrigation canal asin steel gates na saindang tinugdok sa laog kan Brgy. Baras, Canaman. Base sa surat kan CEO an ginibong pag-adal asin pagsurvey sa sinambit na irrigation canal asin an paghagad sa NIA kan saindang maninigong considerasyon asin aksyon. Parte kan surat ni Engr. Palmiano na hinahagad sa sinambit na ahencia iyo an minasunod; ‘’1. Lowering of the crest level at the control structures. 2. Increase the width of the channel at the control structure.’’ An surat narecibe kan NIA kan nagtutukaw pa bilang OIC Director si Engr. Romeo Lopez alagad puon kasuodma niribayan na siya kan bagong director na si Engr. Bugacia. ‘’Pig-osipon pa kan pamayo sa committee on infrastructure na kan taon 2012, nagkaigwa man nin siring na pagbaha. Huli kaini, saiyang hinahagad an tabang kan DPWH Regional Office na kaipuhan an dakulang proyecto kan ahencia na narealisar kan taon 2014 an construction/rehabilitation/improvement kan Clupa-Calauag-Canaman flood control project na nahaman ini asin natapos kan 2015. Huli ta dai kaiba sa plano kan proyekto mayong flooring kun kaya dakul na daga, laboy, mga basura na nawalat asin haralangkaw na duot an nagturubo digdi. Resulta kan pagbara asin dai pagfuncionar nin marhay kan canal na ini. An ginibo pong inspeksyon kan CEO sa pangengenot ni Engr. Palmiano asin an saindang lingcod para matawan nin maninigong pag-asikaso asin aksyon nganing maresolberan an problemang ini’’ sabi pa. Kadakli sa mga barangay kan ciudad inabot nin tubig baha na nilaog nin tubig an kadakli sa mga kaharongan alagad sa mga residentes kan subdibisyon sa Brgy. San Felipe asin Calauag an nagkabirigla huli ta namatian ninda an hararum na pagbabaha kan nakaaging semana kun icocompara kan nakaaging mga taon. Alagad sa resulta kan inspeksyon kan CEO saro sa causa iyo an halangkaw na irrigation control structure asin dai nagfufuncionar na flood gate.