CDA mandato magcampaña sa Federalismo ni Duterte

Pinapahiro kan Malacañan an mga ahencia de gobierno na napapayongan kan Opisina kan Presidente nganing itulod an advocacia asin ipaliwanag an pighihimong federalismo kan administrasyon ni Presidente Duterte. Si Ms Grace Layosa, Assistant Regional Director kan Cooperative Development Authority (CDA) sa Bikol nagpahayag mandato kan saindang opisina central na ipaintindi sa mga lideres asin miembros kan rehistradong cooperativa kun ano an federalismo asin ano an karahayan asin magiginibo sa mga cooperativa. Iyo palang ini an mandato sa CDA Bikol na ipaliwanag an mga importanteng probisyones sa gobierno federalismo alagad saindang hinahalat an dagdag pang mga inpormasyon hali sa Department of Interior and Local Government (DILG). Igwang mga positivo asin negativong reaksyon hali sa grupo kan rehistradong cooperativa alagad an perming intensyon kan gobierno iyo mga programa sa karahayan kan namamanuan, sabi pa. Labi na sa siete mil an rehistradong cooperativa sa Bikol na kadakli sa sainda milyonaryo na asin nagdadakula na an mga miembros. Nagkapera sa mga lider kan cooperativa sa Camarines Sur na nakaolay kan Bicol Mail an nagpahayag na dai sinda uyon sa pigtutulod na federalismo bako lang sa dai pa ninda nasasabotan envez dawa anong forma nin gobierno kun an lider toltol asin bakong kuraptong opisyal maasenso an nasyon. Nagtutubod sinda kun marealisar an federalismo dakula an posibilidad na magkaigwa naman nin regional dynasty lalo na sa mga politico na habo nang maghali sa poder. Afuera kan mga ahencia na yaon sa lindong kan Malacañan, an ginagamit na ngonian kan DILG iyo an mga Liga ng mga Barangay mala ngani pigpasa-irarum na sinda sa mga seminar/training nganing makatabang sa advocacia sa federalismo. (dpa)