MANGA NADAKOP KAN PDEA: Brgy Kgd, empleado kan City Hall, 6 iba pa, gabos positivo sa droga

Madaling magpahimotik alagad an resulta kan drug test gabos positivo sa paggamit nin shabu an walong nagkadarakop na mga envuelto sa ilegal na droga na nasiog sa ginibong buy-bust operation kan Philippine Drug Enforcement Agency (PDEA) kan Miercules, Enero 10 sa Dimasalang Street, Brgy. Sta Cruz, Ciudad nin Naga. An walo na gabos nag-aatubang na nin caso sa pagbalga kan Act Republika 9136 o mas midmid sa Comprehensive Dangerous Drug Act of 2002 iyo sinda Barangay Kawagad Romeo Calañada, 50, kan Bagumbayan Norte, Roger Caliba, 40, empleado kan City Hall na destino sa Naga City Abattoir, Randy Palacay, 37, taga Brgy Cararayan; Ronald Palacay, 39, taga Brgy. Cararayan; Norman Mendoza; Celso Calisura, 58, taga P. Santos, Sta. Cruz; presidente kan PTA sa Sta. Cruz Elementary School, Ciudad nin Naga; Alvin Ferrer, 33, taga Brgy. Tabuco, asin an may kagharong na si Pedro Ponte, 44. An PDEA Bikol na pinamamayohan ni Regional Director Christian Frivaldo tolos pina-drug test kinaagahan an mga suspechado sa Drug Laboratory kan ahencia sa Ciudad nin Legaspi asin sa resulta anas sinda nagpositivo na naggagamit nin shabu. Sa operasyon kan PDEA Camarines Sur asin Bikol saindang nasamsam an 50 gramos nin shabu na nagcacantidad nin P300 mil. Si Brgy. Kgd. Calañada, kan pig-iinvestigaran kan awtoridad nagpapahimotik kan saiyang pagkaka-envuelto sa ilegal na droga huli ta napahapit sana siya sa residencia ni Ponte maging an iba pang nagkadarakop. Siya iyo an pamayo kan Committee on Peace and Order kan Barangay Council kan Brgy.Bagumbayan Norte asin dating nag-iiba sa Naga City Police Office sa mga ginibong Oplan Tukhang. Nabigla an mga residentes kan saiyang barangay maging kan opisyales de barangay matapos matalikop kan PDEA na envuelto sa droga. Sa lado ni Caliba, huli kan sinambit na caso nakatalaan na siyang halion bilang empleado kan City Hall mantang mandato kan Civil Service Commission na an arin man na empleado kan gobierno na maprobaran na naggagamit nin ilegal na droga ciertong sisipaon sa serbisyo.