NIA tolos nag-aksyon sa resolucion kan SP

An National Irrigation Administration (NIA) tolos nag-aksyon sa resolucion kan Sanggunian Panlungsod kan Ciudad nin Naga na mapakarhay an raot na flood gate asin irrigation control structure kan ahencia na namumugtak sa Canaman, Camarines Sur alagad konektado ini sa waterway kan Barangay Calauag. Si Ed Yu, opisyal ba parataram kan NIA Bikol nagsabi na igwa nang instruksyon an saindang director rehiyonal sa provincial office nganing asikasohon na iimplementar tolos an rehabilitasyon para malikayan na an mga pagbaha arog kan nakaaging semana. Puon kasuodmang Miercules, Enero 17 nag-asumir na sa posisyon si Engr. Ramon Bugacia bilang bagong director kan NIA Bikol karibay ni OIC Director Romeo Lopez, na segun ki Yu pinaabot na niya an informasyon asin resolucion kan City Hall. An NIA irrigation control structure saro sa naging causa na magparalangkaw an tubig baha sa subdibisyon kan Barangay San Felipe asin Barangay Calauag na haros gabos na harong sa Villa Karangahan asin Clupa sinanop nin tubig baha. Si Consejal Vidal Castillo, nagpahayag man nin pasasalamat sa NIA huli kan marikas nindang aksyon matapos kan saiyang privilege speech sa Sanggunian Panlungsod si nangyaring causa kan tubig baha sa magkataid na duwang barangay asin saiyang pigpadrenohan na resolucion. Piglinaw kan NIA Bikol na an problema sa irrigation canal sakop kan Punta Diamante Communal Irrigation System na yaon sa Canaman, Camarines Sur na pinapadalagan kan irrigators association na iyo an dapat magmantenir alagad mayong nag-aasikaso asin nagmamantenir mientras na sige an iriwal kan mga opisyal. Buot sabihon mayo na sa direktang pagpadalagan kan NIA envez sa irrigators association alagad dawa na arog kaini nagsugo na an ahencia nganing pakarhayon an flood gate asin dapat buhayon giraray an Irrigators Association. (DPA)