Condor Bikol dai magbabago contra sa jeepney phaseout

Dai magbabago nin panindugan an Condor Bikol contra sa jeepney phaseout na nag-eedad na nin quince años na iimplementar kan Department of Transportation (DOTr) ngonian na 2018 bilang parte kan PUV modernization program. Si Joel Pillogo, presidente kan Condor Camarines Sur asin regional coordinator kan grupo digdi sa Bikol nagpahayag sa entrevista kan Bicol Mail saro sa isyu kan saindang pagcontra iyo an sobra kamahal an presyo kan iriribay na electric-powered o Euro 4 na dai kakayahon kan ordinaryong operator, na malinaw na anti poor program kan gobierno nasyonal. Aaboton sa P3.2 milyon kun hulogan mientras na kun babayadan nin cash cantidad P800 mil hasta sa P1.8 milyon. Sagcod sa ngonian mayo pang jeepney operator/driver sa Bikol na interesado na magbakal kan Euro 4 alagad saindang piglinaw na dai sinda nagcocontra sa modernization program kan gobierno envez an paliog na presyo. Sa ngonian labi sa 95 por ciento na kan mga jeepneys sa nasyon an enterong apektado kun idadagos kan gobierno an phaseout, sabi pa. Afuera pa kaini, dai sinda tiwala sa calidad kan Euro 4 na puedeng magsakat sa mga upper barangay bakong arog kan presenting mga ginagamit na pampasajerong jeepney. Nagtutubod an Condor Bikol na matatawan sana nin pabor digdi kan administrasyon ni Presidente Duterte iyo an dakulang corporasyon asin malinaw na sarong pang-iipit sa mga pobreng operator. Kabali sa ma-aapektaran asin mawawaran trabajo iyo an mga mikaniko sa talyer na dai nag-aaram kan mga paghirahay kan mararaot na piyesa mientras na ini electric-powered na iba sa saindang pinag-adalan bilang mikaniko nin mga vehiculos. Sinabi na dai pa estrictong maimplementar kan Land Transportation Franchising and Regulatory Board (LTFRB) an transport modernization program mantang dai pa ngani andam an ahencia. An DOTr nagsabi man na an paghali pisikal kan mga loma nang jeepneys sa tinampo makunsomo pa nin tolong taon, hasta sa 2021. An ahencia nakatalaan pang maglansar nin Motor Vehicle Inspection System (MVIS) nganing madeterminaran kun perang taon na an jeepney asin an kakayahan kaini sa pagkayod aroaldaw. An programa sa modernisasyon may katuyohan na mahali na sa mga tinampo an mga loma na asin taklaon nang mga jeepneys asin maribay nin may calidad na sistema sa transportasyon na inaapod nindang environment-friendly, sabi kan DOTr. (DPA)