Duwang miembros kan robbery hold-up group gadan sa encuentro

Duwang miembros kan Concepcion Robbery Hold-up Group an parejong gadan sa ginibong operasyon sa Bula, Camarines Sur kan pinagsarong fuersa kan Camarines Sur PNP Provincial Office, Regional Public Safety Company, Bula Municipal Police Station asin iba pang elementos nin awtoridad kan magprobar na maglaban sa mga pulis. Sa report kan Municipal Police Station kan Bula, Camarines Sur sa CSur PPO sa pinamamayohan ni PD Jerry Bearis an duwang miembros kan bantogan na robbery hold-up group sa provincia nin Albay pigmidmid na sinda Christopher Caprillas y Lascano, 33 años asin Randy Saunay, 27 años parejong taga Libon, Albay. An operasyon kan mga elementos kan awtoridad piglansar mga alas 11:00 nin aga kan Martes, Enero 30, 2017 sa Zona siete kan Barangay Santo Niño sa banwaan nin Bula kasunod kan mga reclamo na nakakaabot sa PNP kan mga ginigibo kaining pangingikil sa nagkaperang negociantes sa Rinconada area. Perang aldaw pigsubaybayan kan mga awtoridad sagcod na nagkaigwang encuentro sa Brgy. Sto Niño kan magprobar na maglaban sa mga operatiba asin digdi na sinda pinaputokan kan mga awtoridad na tolos man binawian nin buhay an duwang suspechado. Nabawi sa duwa iyo an calibre 45 badil, mga bala kan calibre 45 asin magazine, pitaka asin ID. Sagcod kasoodma an bangkay kan duwa dai pa kinukua kan saindang mga sadiring tawo.