Mga militante, benipisaryo kan ESA nagpiket sa DSWD

Sarong taon asin may sarong bulan matapos kan bagyong ‘Nina’ kan Deciembre 2016 dakul pang mga benipisaryo kan Emergency Shelter Assistance (ESA) sa Camarines Sur na nagkagarabaan nin harong kan nakaaging calamidad sagcod sa ngonian dai pa nakakarecibe kan saindang dugang na ayuda finansyal hali sa Department of Social Welfare Development (DSWD) na cantidad P25 mil cada familia na nagabaan nin harong. Kan nakaaging semana an mga benipisaryo asin militanteng grupo nagpiket sa opisina kan DSWD sa Barangay Calauag, Ciudad nin Naga nganing ikurahaw an saindang reclamo na dapat narecibe alagad an pigtutukdong abalang proceso iyo an saindang opisina rehiyonal sa Ciudad nin Legazpi na pinamamayohan ni regional director Arnel Garcia. Si Nelsy Rodriguez, lider kan Gabriela sa Camarines Sur nagsabi na puros pangako an ahencia inaabot na nin siyam-siyam sagcod dai pa nin toltol na simbag kun nuarin itatao sa mga apektado kan nakaaging calamidad. Sa saindang ginibong protesta napiritan na mag-atubang sa sainda an mga empleados kan DSWD Naga na sinda; Vilma Lim, Gina Cantor, Vilma Garcia, asin Marry Anne Garcia asin saindang pinaliwanag na padagos pa an mga ginigibong proceso antes ipaluwas an sinambit na ayuda. Mayong toltol na kasimbagan an ahencia kun nuarin itatao sa mga benipisyaryo kan ESA na nagkapera pa sanang munisipyo an pinaagi sa LGUs an nakakarecibe, sabi pa ni Rodriguez. Nagkapera pa sanang mga LGU sa Albay, Camarines Sur asin Catanduanes na pinaagi digdi an ayuda na tig-a P25 mil mantang igwa nang enot na tinaong partial na nagcacantidad nin P5 mil. Sinabi pa kan DSWD na cantidad P10 mil an tinataong ayuda sa mga partially damaged na harong asin P30 mil sa totally damaged na harong. An DSWD Bikol iyo an nagseserne asin na-aprobaran kan ESA payout asin an bayad pinapaagi sa LGUs. Kasabay kan sinambit na protesta an grupo nagpasiring sa Plaza Rizal kan Ciudad nin Naga na nagkaigwa nin protest rally sa paghagad nin justicia sa gobierno nasyonal sa pagrumdom kan treceng mga paraoma na biktima kan masaker sa Mendiola na ika-31 taon ngonian na alagad dai natatawan nin tunay na justicia.