TRAIN pang-iipit sa kapobrehan - KMB

Bako lang kapobrehan orog na an sektor nin paraoma an maliligis an pagtios maging an namamanuan Filipino huli kan bagong buwis o TRAIN (Tax Reform for Acceleration and Inclusion) kan administrasyon ni Presidente Duterte, sabi kan Kilusang Magbubukid ng Bicol (KMB). Si Bert Autor, pamayo kan KMB nagpahayag na disganado an saindang sektor sa bagong buwis kan gobierno huli ta mas lalong tinitilok an mga paraoma mala ngani sunod-sunod na an paglumpat kan presyo nin produkto nin petrolyo asin mayor na barakalon sa mercado. Sa paagi kan tax reform law, papadakulon kan gobierno an saindang ingreso alagad bako man para sa serbisyo ki Juan dela Cruz envez para sa ‘’dambuhalang mga proyektong paghahatian lamang na mga ganid na burukrata kapitalista, burgesya komprador at dayuhang korporasyon’’, sabi pa. Kabali pa sa gagamitan kan fondo gikan sa koleksyon kan TRAIN iyo an padagos na pagbabayad sa mga anomaliyang utang sa luwas kan nasyon, siring kan guera contra droga asin an ‘’pasistang Oplan Kapayapaan, at panunuhol sa mga politiko’’. Sa saindang pag-aadal huli kan paglangkaw sa excise tax sa petrolyo asin kan Value Added Tax (VAT) na ibinali kan TRAIN, maglalangkaw an presyo kan mga barakalon sa mercado asin serbisyo arog kan bagas, mga pagkakan. transportasyon asin sa corriente. Sinabi pa na malangkaw nin 21 por ciento an gastos sa produksyon kan mga paraoma asin sa mga preparasyon pa sana sa pag-oma saindang sasapoon an dagdag na gastos sa pag-arkila nin treser, abuno asin pestisidyo. Sainda pang pigkukurahaw an mga caso sa extra judicial killings na kadakli kan mga biktima hali sa saindang sektor. Digdi sa Bikol, 32 an mga biktima sa EJK asin an 22 kaini hali sa Sorsogon asin 26 an political prisoners (PPS) asin an 12 digdi hali sa Sorsogon. Sa kagabsan igwang 632 insidente nin pagbalga sa deretso humano na may biktimang 4,914 katawo, sabi pa sa press statement kan KMB.