TWG pigcrear sa pagresolber kan problema sa tubig baha

Masisimbagan na an problema sa tubig baha sa nagkaperang banwaan kan tercer distrito kan Camarines Sur asin mga subdibisyon sa Barangay San Felipe asin Calauag, Ciudad nin Naga na pigtuyaw ni Consejal Vidal Castillo sa paagi nin privilege speech sa sesyon kan Sangguiniang Panlungsod nganing hagadan nin fondo sa Department of Public Works and Highways (DPWH). Si Bise Presidente Leni G. Robredo kaibanan si Congresista Gabriel H. Bordado Jr. kan tercer distrito kan Camarines Sur pig-atubang sa sarong conferencia an 2nd Engineering District kan DPWH sa Baras, Canaman, CSur, National Irrigation Administration asin opisyales lokal kan Canaman, CSur asin Ciudad nin Naga na saro sa natukar an isyu sa halangkaw na tubig baha na nangyari sa Brgy. San Felipe asin Calauag huli sa raot na irrigation control structure kan NIA. Pigkasundoan sa conferencia iyo an pagcrear nin Technical Working Group (TWG) na magibo nin kumprehensibong plano sa pagresolber kan tubig baha kun panahon nin tig-uran na nagiging causa nin pagbaha nganing madaling maghuros an tubig sa Bicol river. An TWG papamayohan kan DPWH, NIA asin LGUs Naga asin Canaman. Piglalaoman ninda VP Robrero asin Congresista Bordado na sa huring semana kan Febrero 2018 matatapos na kan TWG an kumprehensibong plano sa flood control nganing isumiter ini sa bulan nin Marso 2018 sa DPWH asin hagadan nin fondo ki Sekretaryo Mark Villar. An bise presidente asin congresista kan tercer distrito iyo man matabang nganing mahanapan nin fondo sa flood control project. Kan ika-duwang semana kan Enero 2018 nabigla an opisyales lokal kan Ciudad nin Naga asin iba pang LGUs huli kan perang aldaw na pagbulos nin uran dakul na mga lugar an sinanop nin tubig baha. Sa lado kan NIA nakatalaan hanapan nin fondo an rehabilitasyon kan saindang irrigation canal na namumugtak sa Barangay San Agustin, Canaman, CSur. An pagcrear kan TWG resulta kan privilege speech ni Consejal Castillo, pamayo kan Committee on Infrastructure sa Sanggunian Panlungsod kan Naga na dagos nang pinangenotan an pagpasar nin resolucion na hinahagad sa opisina rehiyonal kan NIA na maninigo na an rehabilitasyon kan sinambit na irrigation canal sa Canaman na konektado sa waterway kan Barangay Calauag. Alagad antes na-aprobaran an resolucion kan Enero 16, 2018 sa paagi kan privilege speech kan consejal saiyang tinawan nin punto an nangyaring paglangkaw nin tubig baha kan Enero 12, 2018 sa duwang subdibisyon kan Brgy. San Felipe asin Calauag na saro sa causa iyo an halangkaw na irrigation control structure na kun haen an gates naka-instelar asin hayapit na agihan kan tubig sa sinambit na estractura. (DPA)