Brgy., SK elections dagos, sabi

Liwat naman pigtutulod sa Camara-Baja an sarong house bill para sa ika-tolong veces na pag-uktaba kan Brgy. asin Sanggunian Kabataan (SK) elections alagad sinabi ni Congresista Gabriel H. Bordado Jr. kan tercer distrito kan Camarines Sur, vice chairman kan Committee on Government and Public Accountability sa ngonian dagos an nakatalaan na eleksyon sa Mayo 14, 2018 base aprobadong ley ni Presidente Rodrigo Duterte. Sa pinaluwas na Comelec Resolution No. 10246 na nagpapako kan mga actividades asin peryodo kan mga pinagbabawal na gibohon sa panahon kan sarabay na Brgy asin SK elections nagtatalaan kan pagplantiar nin certifico de candidatura sa Abril 14 hasta sa Abril 20 asin an eleksyon sa Mayo 14 ngonian na taon, iyo ini an masusunod asin mayo pa kan sinasabing pag-uktaba naman kan pirilian, sabi ni Bordado. Alagad kan nakaging semana sinabi pa kan congresista kan tercer distrito kan CamSur nagplantiar nin bill si Congresista Johnny Pimentel kan Surigao na mag-uuktaba kan pirilian asin ini binasa na sa plenaryo o yaon pa sana sa first reading na maagi pa sa proceso asin debate sagcod na dedebatehan sa senado kun makalusot sa lower house. ‘’Sa ngonian saro pa sanang propuestong an bill na pigplantiar ni Pimentel, chairman kan Committee on Good Government and Public Accountability alagad sagcod na dai pa inaaprobaran ini asin magiging ley sana kun aprobaran ni Presidente Duterte’’, sabi pa. Sa paglibot-libot kan congresista sa saiyang distrito asin paki-juntahan sa opisyales de barangay saindang pigdadangod sa Comelec na dagos na an pirilian sa SK asin Brgy. elections mantang nagpapadagos na an mga pag-andam base sa calendar of activities asin peryodo kan mga pinagbabawal sa panahon kan pirilian na masikad an election period sa Abril 14 hasta sa Mayo 21. Si Alex Marpuri, opisyal na parataram kan Comelec Camarines Sur nagsabi padagos na an saindang ginigibong preparasyon sa pirilian mala ngani pigponan na kan Febrero 12 hasta Febrero 19, 2018 an ‘’period to constitute the members of the Electoral Board and Barangay Boards of Canvassers (BBOC). An saindang trabajo mag-andam kan maabot na pirilian dawa igwang propuestong bill sa congreso sa pag-uktaba mantang nagsusunod sana sinda sa ley alagad kun liwat naman aaprobaran an ley masunod sana sinda, sabi pa kan Comelec.