SA CASURECO II: NEA team nag-uugid na kan mga reclamo vs Lalas

Pig-uugid na kan NEA team an mga reclamo kan junta directiva sa Camarines Sur II Electric Cooperative (Casureco II) contra ki Project Supervisor / Acting General Manager Nelson Lalas na pinapalayas na sa puesto huli sa ‘’loss of confidence’’. Kasoodmang Miercules, Febrero 14 pighampang na kan NEA team an mga miembros kan junta directiva sa pamamayo ni Director Paul John Sta. Ana nganing aramon an mga reclamo sa maluyang performance sa pagpadalagan kan cooperativa nin electricidad. Sinda Abogado Ricardo Orias, Lorenzo Peñollar asin Efren Gongon iyo an sinugo ni NEA Administrator Edgardo Masongsong na iyo an mag-imbestigaran kan mga reclamo ki Lalas, pinataram an gabos na miembros kan junta directiva sa isyu sa loss of confidence laban sa PS/AGM. Yaon sa laog kan board room si Lalas kan hampangon an junta directiva, alagad an NEA team pinaluwas muna an PS/AGM nganing tawan nin buelo an mga reclamo contra sa saiya asin dangogon an mga dahilan kun tano ta dapat palayason na an acting general manager. Si gabos na kapalpakan sa manijamiento kan acting general manager pinaabot sa NEA team na gabos piglista si mga reclamo para sa saindang pag-evaluar antes magdesisyon kun dapat nang halion an acting general manager. An mga director na sinda Gay Pabines kan distrito nin Milaor asin Nicanor Oriño kan distrito nin Magarao, enot nang dai nagpabor sa pinasar na resolucion kan junta kan huring semana kan Enero 2018 na hinuhorot sa NEA na palayason na si Lalas, alagad sa harampangan kasoodma nagsabi na kun hahalion an acting general manager ribayan nin project supervisor. Si Board President Sta. Ana hinagad sa NEA team na mientras na bako naman ’’ailing cooperative’’ an Casureco II dapat magnombra na nin permanteng general manager na kaya nang padalaganon an manijamiento mantang sa ngonian padagos sa paghuros an system loss asin nakaangat na sa problema finansyal. Si Director Jun Cornelio, saiyang pigpresentar si mga resolucion gikan sa lokal na gobierno kan Calabanga asin Bombon, Camarines Sur na nagsusuporta kan saindang inaprobaran na resolucion nganing halion na sa puesto si Lalas. Afuera pa kaini, si mga surat asin resolucion hali sa manlaen-laen na barangay na inabot na nin sarong taon naghahagad nin tabang ki Lalas nganing aksyonan alagad mayo nangyayari na sarong prueba na maluya an liderato kan acting general manager sa mga pinapaabot na reclamo kan miembros-consumedores. (dpa)