BMC magsusuplay na nin dugo sa mga hospital

An gabos na pribado asin sa gobierno hospital sa Camarines Sur dai na madidificilan an saindang mga pasyente na maghanap nin dugo mantang igwa na sindang suplay hali s Bicol Medical Center asin Philippine National Red Cross. Sa ginibong Blood Service Facility Memorandum of Agreement (MOA) Signing sa board room kan Avenue Plaza Hotel kan Febrero 20 na pinangenotan ni BMC Director Dr. Maria Estrella Litam, an BMC iyo na an masuplay nin dugo sa katorceng hospital na dai na kaipuhan makiolay pa sa BMC envez yaon sa mga hospital na nakawarak sa limang congressional district kan Camarines Sur. Alagad an katorceng hospital na kaayon sa mga nakapirma sa MOA matabang na magkalap nin mga voluntad na madonar nin dugo. Sa entrevista kan Bicol Mail ini an mga pahayag ni Dr. Raymundo Ibarrientos, pamayo kan Blood Bank & Transfusion Service kan BMC mantang an envueltong hospital igwang licenciadong blood bank na mandato kan Departamento de Salud (DOH) alagad si dai kabali sa katorceng hospital kaipuhan i-refer sa hospital na igwang saray nin dugo. Nagtatabang sa saindang advocacia iyo an mga lokal na gobierno, PNP asin iba pang orgnisasyon. An mga hospital na ini kinababalehan kan Sta. Maria Josefa Foundation, Bicol Access Health Centrum, Dr. Nilo Roa Hospital, NICC Doctors Hospital, MMGHHSCC-(RMC), St. John Hospital Inc., - Goa, Libmanan District Hospital, USI – Mother Seton Hospital, Our Lady of Mediatrix Hospital, Bicol Medical Center, Naga City Hospital, Lourdes Hospital, Ciudad nin Iriga, St. John Hospital sa Ciudad nin Naga asin Bicol Sanitarium, Cabusao, Camarines Sur. An San Pascual, Masbate na harani sa provincia nin Camarines Sur kabali sa programang ini kan BMC. Base sa saindang network collection kan taon 2017 an BMC nakatipon nin 24,607 bags asin an Philippine Red Cross – 1,037 na igwang total na 25,644 bags. Natabangan kan BMC an 18,072 mga pasyente; sa network members – 8,800 asin sa iba pang network - 488. Dinagdag pa ni Dr. Ibarrientos kan nakaaging tolong semana nagkulang-kulang nin suplay nin dugo sa Ciudad nin Legaspi asin sa Albay na nagtao sinda nin 300 bags sa mga pasyante na nanga-ngaipo nin dugo. Nababa an saindang stock nin dugo kun panahon nin eleksyon mantang siribot an opisyales lokal maging an mga taga barangay huli ta mayong naghihiro nganing maghanap nin voluntad na madonar nin dugo, sabi pa. (dpa)