MNWD: P8M na water lorry, rescue boat dai masasayang

An Metropolitan Naga Water District (MNWD) nagcierto na dai mahuhulog sa white elephant an P8 milyon na water lorry and rescue boat (WLRB) matapos basbasan kan Oktubre 30, 2017 alagad apat nang bulan an nakakaagi dai pa nagiging operational. Si Acting General Manager Engr. Virgilio Luansing nagpahayag sa Bicol Mail na pigcocompleto nalang an materyales naseseguro kan manijamiento na magiging operational an WLRB nganing magsuplay nin tubig sa mga residentes kan barangay na nag-eestar sa gilid kan salog kan Gainza, Camaligan, Canaman Magarao asin Pamplona gabos digdi sa Camarines Sur. Dawa magtabla sa operational expenses aroaldaw, katuyohan kan manijamiento na magkaigwa nin WLRB bako lang sa pagsuplay nin tubig sa mga hararayong barangay envez magagamit pa ini bilang rescue boat kun igwang mga emergencia. Makakatabang sa consumedores sa gilid kan salog na mayong malinig na tubig inumon mientras na an saindang katuyohan kaini ‘’purely public service’’, sabi pa kan acting general manager. Sinabi man ni MNWD Board Chairman Jorge Palma hahalaton muna ninda an opinyon legal kan saindang abogado nganing maibitaran na dai na mag-abot an caso sa jusgado mantang ma-imponer sinda nin multa sa contractor na nagconstruhir kan WLRB huli sa naabalang pagtapos kan proyecto na dai nagsunod sa pigtalaan nindang bulan asin taon. An proyecto pigpunan kan taon 2014 alagad pigbabasol an contratista huli ta dai nasunod sa pigtalaan na target date. Duwang tangki sana an WLRB na pueding kargahan nin limang metros cubicong tubig an cada saro, gagastosan pa nin gasolina aroaldaw asin dapat igwang empleados. Kun an lorry truck kan MNWD na may cargang diez metros cubico na na-ipapabakal sana an tubig sa commercial rate na P3,650 arog man kaini an venta sa tubig kan WLRB na kaya sanang magcargang hasta sa diez metros cubico na puedi sanang magtabla sa mga gastos cada viaje. An WLRB, pig-oorgullo kan manijamiento huli ta sinda sana an igwa kaini sa mga water district sa Kabikolan. Kan panahon ni Board President Fortunato Mendoza sa paagi nin resolucion narealisar an pagpa-construhir kan WLRB. (dpaureus)