Propuestong Magna Carta for Brgys sinusuportaran kan LnB Bikol

Nagpaheling na nin pusog na suporta an Liga ng mga Barangay sa Bikol sa propuestong bill No. 277 sa senado na mamukna kan Magna Carta for Barangays na pig-introducer ni Senador Aquilino Pimentel Jr., na mayor na katuyohan ipako asin langkawan an saindang sueldo asin marecibe kan mga biyaya kaparejo kan mga regular na empleados kan gobierno. Si Punong Barangay Tomas Ramon Sanchez Jr. kan Brgy San Francisco sa Ciudad nin Naga asin ex-oficio member sa Sangguniang Panlungsod nagpahayag sa Bicol Mail na sa ginibo nindang LnB Regional Unity Summit on Federalism sa Ciudad nin Baguio dai palang nahahaloy nagkasararo an saindang Liga na aprobaran an resolucion na pusog nagsusuporta sa senate bill ni Senador Pimentel na iyo an pamayo kan Senado. Base sa bill kan Senate President, an punong barangay, sangguniang barangay members, kabataan barangay chairman, barangay secretary asin barangay treasurer sa enterong nasyon dapat ipako na an saindang mga sueldo, allowances, insurance, medical and dental coverage, retirement benefits asin iba pang biyaya kaparejo kan regular na empleados kan gobierno. An PB marecibe nin cantidad kaparejo kan bulanan na sueldo kan miembros sa sangguniang bayan kan saindang munisipyo. An anom na miembros kan sangguniang bayan lambang saro sa sainda marecibe nin cantiad 80 por ciento kan sueldo kan miembros kan sangguniang bayan. An SK chairman, brgy. secretary, treasurer lambang saro sa sainda marecibe nin cantidad 74 por ciento sa sueldo kan miembros sa sangguniang bayan. Kaayon pa sa propuestong charter sa barangay iyo an minasunod; an cada barangay igwang sadiring vehiculo, dapat cada brgy. kaipuhan igwang sarong elementary school, asin health center, an kahirasan kan mga barangay sa national taxes maninigo na iremiso sa sainda, gabos na fondo pampublico para sa pagmantenir nin mga tinampo sa brgy asin tulay dapat ibalyo direkta sa general fund kan lambang barangay, viente cinco por ciento kan gabos na buwis na nakolecta sa propriedad real sa laog kan barangay considerado fondo sa barangay, an cada barangay kaipuhan magkaigwa nin diez por ciento hali sa gabos na forma nin buwis, mga binayad, penalidad, na nakokolecta sa mga persona na nag-eerok sa saindang barangay asin nagkapera mga biyaya na dapat marecibe ninda base sa propuestong ley. An opisyales de barangay haros viente cuatro oras an saindang trabajo na kadakli kan mga responsibilidad ipinapasa sa sainda kan gobierno sa pagreparo kan saindang residentes, huli kaini dapat i-angat naman an saindang pagbuhay, salud, compartableng pagbuhay, asin matawan sinda kan tamang facilidades na kaipuhan kan barangay bilang sarong sadit na LGU, sabi pa sa senate bill 277. (dpa)