Alcalde Brioso sinuspende, dai pa mahali sa posisyon

Libmanan, Camarines Sur - Sa ika-duwang veces, si Alcalde Bernard Brioso kan banwaan na ini liwat sinuspende kan Capitolyo Provincial sa laog nin anom na bulan bilang castigo sa casong Grave Misconduct and Abuse of Authority sa reclamo na sinangat ninda Bise Alcalde Romel Bulaong asin mga miembros kan Sangguniang Bayan digdi afuera ni Consejal Don-don Atienza na kaalyado sa politica kan jefe ejecutivo. Alagad piglinaw ni Brioso magpapadagos pa siyang maglaog sa trabajo bilang alcalde mantang base sa suspension order na pig-isyu hali sa opisina ni Gobernador Migz Villafuerte, igwa pa siyang treinta (30) diyas nganing magplantiar nin motion for reconsideration sa Sangguniang Panlalawigan o sa Malacañan. An suspension order kan Capitolyo Provincial narecibe kan saiyang opisina alas 2:29 hapon kan Marso 6, 2018 asin tinatawan pa siya na maghanap nin remedyo sa laog nin treinta diyas na magplantiar nin MR mapatapos marecibe an orden. Sinabi kan alcalde na motivo political an castigo sa saiya kan Capitolyo Provincial matapos magdeclara na nin candidatura si Diputado Rolando Andaya Jr. kan premir distrito na macandidatong gobernador nganing labanan si Gobernador Villafuerte. An jefe ejecutivo dayupot na lider asin kaalyado sa politica kan diputado asin ini an saro sa mayor na dahilan, sabi pa. Segun saiya an caso administrativo contra sa saiya huli kan pag-isyu nin business permit para sa tolong mga bulangan. Saiyang piglinaw nag-isyu sana siya nin renewal kan permit para sa operasyon kan sinambit na mga bulangan alagad dati na ining aprovado kan nagtalikod na administrasyon lokal. An mga nagsangat kan reclamo sa Sangguniang Panlalawigan pigbasehan an PD 449 na midmid sa cock fighting law na pigsasabi kun an sarong banwaan igwa nang sangatos mil na populasyon kaipuhan sana mag-isyu nin business permit an alcalde para sa duwang bulangan. An jefe ejecutivo enot nang pinabakasyon kan Capitolyo nin 90 diyas na preventive suspension poon kan Deciembre 13, 2017 sa kaparejong caso alagad naprobaran soboot na nagkasala huli kaini kinakasitigo siya nin anom na bulan na suspension. Kasoodma si Brioso nagpaluwas nin memorandum sa gabos na department head kan munisipyo na siya pa an padagos na magtutukaw sa puesto mantang igwa pa siyang treinta diyas nganing magsangat nin MR. Andam magsunod sa orden alagad kaipuhan halaton an pinal na desisyon, sabi pa. Piglalaoman na magkakaigwa nin controvercia sa suspension order sagcod na magkaigwa nin duwang alcalde matapos maghorar na si Bise Alcalde Bulaong bilang acting mayor asin si topnotcher councilor Alex Mendoza bilang acting vice mayor. (dpa)