Casureco III nakabangon na

Ciudad nin Iriga – Perang taon naging bangkaruti an manijamiento kan Camarines Sur II Electric Cooperative (Casureco III), alagad sa laog sana nin sarong taon na pag-administrar kan NEA’s Task Force Duterte Rinconada Power nakaangat na sa Category C hali sa dating inaapod na ‘’ailing cooperative’’. An Task Force naglaog sa manijamiento kan Casureco III kan Febrero 7, 2017 sa tahaw kan inaatubang na problema finansyal na inabot na nin bilyones pesos na dai na nakakabayad sa mga obligasyon sa saindang power supplier, National Grid Corporation of the Philippines (NGCP), Power Sector Assets and Liabilities Management (PSALM) corporation asin NEA, alagad sa ngonian si dating 87 por cientong collection efficiency nagsakat na sa 91 por ciento asin target ninda sa mga masunod na bulan na maglangkaw pa ini hasta sa 97 por ciento. Ini an mga pahayag ni Casureco I General Manager Ana Sylvia Alsisto, designadong chairman kan junta sa entrevista kan Bicol Mail alagad posibleng matapos ninda an trabajo sa laog kan presenting taon defende sa directiva kan NEA. Naghuros na sa 14 por ciento an systems loss hali sa dating 19 por ciento asin pigcoconsiderar ninda an plano na dapat magbaba pa ini sa diez por ciento alagad mangyayari ini sa paagi kan pagribay kan lomang mga transmission lines, transformers asin iba pang gamit na nakaka-apektar sa dalagan kan corriente. Kabali sa mga reforma na pig-implementar kan Task Force asin saindang acomplisimiento iyo an debt restructuring sa PSALM, NGCP, NEA, asin sa SMEC na iyo an saindang power supplier na kun haen inaabot nin labi sa bilyones pesos an pagkaka-utang kan cooperativa nin electricidad. An obligasyon finansyal kan cooperativa cada bulan sa SMEC nagcacantidad nin P49.6M mantang sa NGCP, P9.6M. Sa iba pang pigkaka-utangan nagbabayad pa sinda cada saro nin diez hasta quince milyones pesos. Huli kan pag-angat kan saindang kamugtakan finansyal an cooperativa nin electricidad dai na nadidificilan na magbayad kan mga obligasyon, sabi pa. Sinabi pa huli kan mahiwas na campaña contra sa mga paraikit nin corriente nadiscobre ninda an mga envuelto na igwang mga ilegal na koneksyon, dai rehistradong mga metro, direct tapping, jumpers, sadiring pagbugtak nin koneksyon asin pag-usar nin mga raot nang metro. Kairiba sa Task Force na pinatukaw kan NEA bilang mga directors iyo sinda: Casureco IV General Manager Veronica Briones, co-chairman; Quezelco General Manager Victor Cada, secreterary; Wilbur Almoneda, treasurer; Rev. Fr. Rey Caceres, auditor; Perfecto Ignatius Cheng, alternate secretary, asin Wilfredo Bucsit bilang ex-officio member asin acting general manager. Sa laog na nin nagkapera taon, nagkapera nang mga project supervisor/acting general manager an pigdestino digdi kan NEA alagad dai na reresolberan an problema finansyal sagcod na igwa nang propuesto na isa-pribado na an cooperativa nin electricidad alagad sa ngonian luway-luway nang nagsasakat an saindang kategoriya. (dpaureus)