ENRO kasurog kan DPWH sa pagpalod nin mga kahoy

Nakakua nang kasurog an Department of Public Works and Highways (DPWH) sa saindang kahuroton na dapat purotolon na an mga poon nin kahoy na nakakaulang sa pig-iimplementar na road widening project sa manga national road. An Environment and Natural Resources Office (ENRO) kan City Hall sa Ciudad nin Naga nagpahayag na maninigo nang suportaran an proyecto kan DPWH na igwa man tamang lugar na dapat tanuman nin kakahoyan na dai makakaulang sa proyecto kan gobierno. Si Alexander Caning, ENRO Officer kan ciudad nagsabi an objetibo kan gobierno mapahiwas an tinampo na saro sa katuyohan makaresolber sa problema sa trafico alagad kun dai papaludon an mga ulang sa road right of way kan DPWH yaon an peligro sa mga aksidente sa motorista. Kun igwa man grupo na nagpapabistong mga environmentalist na padagos an panindugan contra sa pagtugot kan Department of Environment and Natural Resources (DENR) sa DPWH na purotolon na an puon nin kahoy na ulang sa proyecto, iyan saindang deretso alagad dapat maintinihan man ninda an katuyohan kan road widening project kan gobierno, sabi pa ni Caning. Si Caning, nag-atubang sa sesyon regular kan Sangguniang Panlungsod kan Lunes, Martes 5 para sa saiyang kumfirmasyon bilang bagong pamayo kan ENRO kan City Hall. Hinapot sa saiya ni Bise Alcalde Nelson Legacion an isyu sa pagpalod nin puon nin mga kahoy sa road right of way asin saiyang sinimbag na pabor siya digdi asin ini an panindugan kan saindang opisina. An Sangguniang Panlungsod igwa nang pinasar na resolucion na nagpapabor sa pagpalod nin mga kahoy nganing tawan nin buelo an mga pig-iimplementar na road right of way. Magigirumduman kan administrasyon ni Presidente Aquino igwa nang pigtagamang P100 milyon para sa pagpahiwas kan Daang Maharlika haling Brgy. Del Rosario, Concepcion Grande, Pequeña hasta pasiring sa Mabulo, gabos sa Ciudad nin Naga alagad dai na-implementar huli kan pagcontra kan nagpapabistong mga environmentalist sa pagpalod kan mga gurangan nang kakahoyan na nag-eedad na nin 60 hasta 80 años. An fondo binawi kan dating DPWH Secretary Rogelio Singson alagad sa ngonian posibleng ipadagos an proyecto kan bagong DPWH Secretary Mark Villar. (dpa)